(صرخ) عبد الموجود حمدان التايه لما قالوا له لازم يا عبد الموجود تعبى إقرار ضريبى وتكتب فيها العشة البوص القش واللى من غير سقف اللى أنت ساكن فيها دى، وقال:
- عليا الطلاق ما انا كاتب ولا مقدم . أيه المصخرة دى ( المسخرة ) والله يلعن أبو الحكومة . هما مالهمش شغلانة غيرنا ويقعدوا يفننوا لنا عشان يقرفونا.
- حيلك حيلك وطى ( صوتك) . أصلك حتقدم.
- طب عليا الطلاق بالتلاتة ما أنا مقدم .
- اللى ما يقدمش الإقرار حيغرموه 300 جنيه .
- بتقول أيه يا محمدين – إلهى يجيك خابط – 300 جنيه 300 جنيه واجيبهم منين؟ .
- ما تخفش يا عبد الموجود الحكومة مش حتاخد منك ضرائب عقارية على العشة ، حتى ولو كانت بيت ملك وبدورين .
- الله الله وطب لما هم مش حياخدوا منى ضريبة اكتب إقرار ليه.
- بيقولوا ياسيدى لما انته ( تعبير فلاحى متداول غير معروف معناه إلا كلمة يا سيدى ) علشان يحصروا الثروة العقارية المصرية واللى تقدر بكام تيريليون
- طيب يحصروها ليه وعشان أيه.
- عشان الخطط المستقبلية للبنية التحتية من مياه وكهرباء وصرف صحى وخدمات تعليمية وصحية.
- وعشتى مالها ومال البنية التحتية ، أنا مش عاوز منهم حاجة .
- العقارات كترت وعقبال عندك البلد أتملت منتجعات وفلل وقصور بقولك قدروها بكذا تريليون.
- طب ما هم قدروها خلاص ثم إيه التيريليون ده أكثر من الألف جنيه.
- حاجه ذى كده.
- طب لما هم عايزين يحصروا العقارات ما يحصروا هما وإحنا مالنا ويعنى هما مش عارفين بيوتنا وعششنا دول عارفينها شقة شقة وبيت بيت وحارة حارة وشارع شارع وبلد بلد دا الحكومة عارفة كل حاجة وعارفة أى حاجة وما بتعملش ولا حاجة.
- أيوه هما عارفين ولما عملوا التعداد السكانى من كام سنة عدونا نفر نفر ونمروا البيوت بيت بيت والمحلات محل محل وكشك كشك والزرايب زريبة زريبة حتى اللى ما فيهاش بهايم . ، لكن والله أعلم إن الموضوع فيه إنّ ( حاجة مش معروفة بس وحشة).
- فيه أيه يا محمدين ؟ ما تنطق يا وله ، سيبت ركبى أكتر ما هى سايبة ، ما يكونش لما نكتب العشش والزرايب اللى عندنا يكونوا ( بيضحكوا) علينا ويروحوا يمسحوها ويكتبوا بدل العشة فله ( فيلا) وبدل الزريبة مصنع سباخ بلدية... ( ضحك جماعى ببلغم وينتهى بكحة ) ، اللهم اجعله خير .
- لا يا عبد الموجود دا يمكن بعد سنتين تلاته ويجى وزير جديد يلحس كلام الوزير دوت ( هذا) ويقول الإعفاء من الضريبة على الفقراء اللى زينا ( دا كان زمان وجبر) ، ( إدفع يا خويا أنت وهو) وإحنا غلابة حندفع على طول .
- يعنى دكهمّ ( هؤلاء) يدفعوا ستين جنيه على السراية بس وإحنا ندفع غرامة على عدم تقديم الإقرار 300 جنيه يا مصيبة ياولاد .
- يعنى لسه منشف رأسك يا عبد الموجود ومش حتقدم الإقرار دا يمكن يسجنوك لما ما دفعتش الغرامة وتتبهدل وتسيب زرعتك تنشف يبقى لا طلت عنب الشام ولا بلح اليمن .
- لا يا خويا حاقدم الإقرار هو فين الإقرار ده
- الحقلك واحد عند محمد أبو إسماعيل يقولوا جاب له شويه من البندر بيتسبب فيهم ( من سبوبة ) وابعد عن الشر وغنّى له .
- والجماعة الهبل يقولوا إن الحكومة خدامة الشعب ، لأ دا الشعب هو اللى خدام تراب رجلين الحكومة وسلم لى على المترو.
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة