فيسبوك
واتساب
أنا بسأل سؤال واحد ومستنى تجاوبينى
أنا ولدك ومن بطنك وأخويا اللى جرح عينى
ومش من ضره أو من بره يا أم الدنيا جبتينى
ولو ولدك أخويا يعيش فى أحسابك وانسابك وأنا فى الطل ترمينى
عشان الأب مش باشا ولا فى العيله فيه واسطه تزكينى
مانا برده تعبت كتير ولو نقعد ونتحاسب ياريت نقعد تحاسبينى
ومين قالك يا مجهودى هنقدر على أنا عايزه تودينى
دنا مشطوب من الدفتر ومش حظهر على الصفحة ولا الهامش يكفينى
دا شىء محسوب ومتقدر مين اللى واسطته أكبر ولو تدفع تساوينى
أبص لفوق على حضنك يدين ولدك تغمينى
والاقى الحضن مش حضنى وألف صباع طرف عينى
أنا مفطوم ومن بدرى وطال صبرى ولما كبرت سبتينى
بقت كراسيكى تتورث وظلم الواسطه يدرس ومين حقى هيدينى
منيش وارث وصفحة عيلتى فى السلطة أكيد انضف من الصينى
ومش عاوز أكون واحد من النخبة ولا عيلتى سلاطينى
ولا عايز كراسيكى ويخت لبر مراسيكى يعدينى
ولا منصب وأشيل السيف وعودك أدى وش الضيف وتنسينى
ومهما جوايه كتمتى النفس وف نفسى حبستينى
أنا بعشق تراب قدمك ولو حتى كرهتينى
وحبك فى الحشا ثابت واسمك ناقشه ف جبينى
هواكى معدى فى كيانى يا معجونه بتكوينى
