المحور اللى اتفتـح.. بالونش جم قفـلـوه
والموكب اللى عبر.. ميت عسكرى حيّوه
والشارع اللى اتردم من شهر.. ليه شقّوه؟
والحالة صبحت عدم والدعم أهو رفعـوه
خليك معايــا وصحصح للأمــور ديه
أصل الحكـومة دى من طينة سويسريـه
الله عليه العوض.. غنّى يا واد ظلمــوه
***
كان إيه لزوم الضريبة والبكش على مين؟
والحفلطة فى المجالس ولا سب الديـن؟
علشان نقول الحقونا والغلابـة لميــن
بعديها يظهر جــدع عترة بفم متيـن
يعفينا من ربعهـا أو نصهـا ويزيــد
ويطبلوا فى الجرايد: "الريـاسة حديـد"
والخلق يتمرمغوا فى الأرض منبطحين!
***
لو كل واحد ضرب نفسه قلم حيفـوق
وان صدّره للّى جنبـه تبقى قـلة ذوق
بس الحريقة ماتصبحشى رماد وتروق
من غير ما ندلق عليها جردل المزنوق
ماتكونش فاهم غلط وإياك تقول دا قبيح
أنا بس قمت النهارده قلت حبقى صريح
من يوم ورايح ولو كان الثمن.. مشنوق
مشاركة
اضف تعليقاً واقرأ تعليقات القراء
مشاركة
