فيسبوك
واتساب
بتقولى إنك مش حزين
بتكدب بس على مين
ما أنا زيك يا صاحبى مجروح
وشايل فى قلبى م السنين
من كام سنة نفسى أفرح
من كام سنة وكل شىء أقابله بيجرح
ومش قادر أمل حاجة
قول وبوح
مش إحنا أصحاب
وعايشين نفس الألم
وشاربين نفس العذاب
من كام يوم وأنت ساكت
مفيش ولا كلمة
حتى بسمة الصبح الوحيدة
من عينيك غابت
قولى بس فى إيه جديد
حاولت اتصل بيك إمبارح
لقيتك سايب رسالة بتقول
الشخص المطلوب بايت مهزوم مغلوب
وحالف ما يكلم حد
هيكلم مين وليه
والدنيا كل ما فيها قاسى
ولا له فيها صاحب ولا محبوب
ونسيت إنى صاحبك
إنى الوحيد اللى زيك
وإنى فاهمك وشايل همك
براحتك يا صاحبى
بكرة تطيب
وترجع تانى لينا
وساعتها عمرى ما أعاتبك
مفيش حبيب بيعاتب حبيب
