أيمن خيرى محمود عبد الوهاب يكتب: إنجازات

ربنا يبارك فى التكنولوجيا والتطور العلمى اللى خلونى أقدر أشوف قناتين فى وقت واحد عن طرق خاصية الصورة داخل صورة، وده ساعدنى فى متابعة برنامجين من أكثر البرامج جدلاً، حيث رأس السنة وبرامجها الشيقة، فكل قناة تسعى لجذب المشاهد وزى ما أنتم عارفين أنا أعز التليفزيون جداً. المهم تابعت برنامج حوارى على القناة دكها وآخر على دكهيا وتناولا بالصدفة طبعاً موضوع "إنجازات العام المنصرم وأمنيات العام القادم"، وبما أن الموضوع شيق لزم له كوب شاى بلبن وشويه لب سوبر وسودانى، وبعدها دار الحوار بين المذيعة والمسئول الكبير على القناة دكها والمذيع والمواطن على القناة دكهيا:
المذيع: نتعرف عليك
المواطن : اسمى إبراهيم وشغال فى شركة الميه.
المذيع: إيه أمنياتك فى السنة الجديدة
المواطن: هى جت... هى بقت كام... مش مهم بس أنا نفسى فى حاجات كتير... فى وقت فى البرنامج
المذيع: آه طبعاً اتفضل البرنامج ده معمول علشان حضرتك البرنامج ده من أجلك أنت...
المواطن: طب يا أستاذ شكراً... أنا نفسى لما يجيلى مرض أنا أو حد من العيال ألاقى مستشفى محترمة تداوينى ويعاملونى زى البشر.
**********
المذيعة: سيادة معاليك تتمنى إيه فى السنة الجاية سعادتك
المسؤول: بصى يا بنتى مش هقولك إحنا عملنا وسوينا.. لا لا لا... إحنا لسه بنقول يا هادى... إحنا إيه بقلنا خمس سنين لكن الخطة لسه مفتوحة ومستمرة للنهوض بمحدودى الدخل... الناس دى أهم ما يشغل بالنا فى الفترة اللى جاية... والدليل الاهتمام بالرعاية الصحية والتأمين الصحى... روحى كده أى مستشفى حكومى وأنا أتحداكى إن عرفتى الفرق بينها وبين أى مستشفى خاص.
**********
المذيع: مفهموم طبعاً... وإيه كمان....
المواطن: إيه نفسى يا أستاذنا أعلم عيالى تعليم عالى فى مدرسة مش فى إصلاحية... وفى جامعة مش فى مركز تعليمى من بتوع الثانوية العامة... أصل التعليم هو اللى باقلنا يا أستاذنا إحنا لا لينا حد يشغلنا ولا فلوس تقوينا.... ويقاطعه المذيع تقصد إيه يا عم "ابياهيم" يعنى الموضوع فيه وساطة
يرد المواطن : "ابياهيم" أنت شايف إيه.
**********
المذيعة: بكل افخر و اعتزاز تقول إيه عن إنجازاتك
المسئول: اممممممم ... ده مش وقت كلام عن إنجازات ده وقت شغل... تقاطعة المذيعة... الله على معاليك كمل سعادتك..
آه طبعاً زى ما قلت وبأكد أن التعليم هو الركيزة الاساسية لأى عمل داخل المجتمع ولا مساس بمجانية التعليم... آه فى تعليم تجريبى ولغات ودولى وجامعات خاصة ودولية، لكن يبقى العلم فوق الجميع... دول يا بنتى ولادنا برضو... علشان كده معيار اختيارنا فى أى مكان فى البلد بيكون على أساس الكفاءة العلمية والمهنية ولا مكان بيننا للوساطة... ده اسمه فساد.....
**********
زى مبقولك كده يا أستاذ... نفسى كمان لما اشترى شقة أو حتى مطرح اتنصف فيه... يتدخل المذيع قائلاً تتنصف فيه إزاى.... يرد إبراهيم... يعنى مش بعد سنة ولا اتنين وبعد ما أسكن ودخل الكهربا والمياه والتليفون يكتشفوا أن العمارة فجأة مخالفة ولا تحتها منجم آثار... ويكتبولها إزالة...

**********
طبعاً ... طبعاً مفيش حد هيفلت من العقاب كل المقاولون اللى بيفتروا على الغلابة هيجوا وهيدفعوا غرامات وإن مدفعوش "هنطلع روحهم"... كفاية أنهم بيبنوا أبراج 13 و14 دور بقلهم زمن من ورانا... زمن الـــ..... ..... خلاص انتهى ...

**********

"يا ييت " تنجز يا عم إبراهيم... فى حاجة تانى نفسك فيها قبل ما ننهى البرنامج...
"يا ييت" تتدينى فرصتى يا أستاذ مجتش عليا اعتبرنى لعيب كورة... نفسى كمان لو سمحتوا لى فى شوية مراعية... نفسى أروح شغلى بدون بهدلة ونفسى كمان يخفو علينا من مصاريف البنزين اللى كل شوية فى زيادة...
**********
أكيد يا بنتى... القاهرة زى ما أنت عارفة مدينة كبيرة ومليانة طرق ونسبة السكان فيها عالية جدا... وبتالى الزحام المرورى شديد... إحنا علشان كده فكرنا ننقل سكن المسؤولين برة البلد أو على حدودها... واتحدى حد يقول إن الطرق فيها زحمة علشان "أبصر مين" أوعدكوا جميعاً أن الموضوع ده لن يحدث إلا فى أوقات خروج ودخول المسئولين من وإلى المدينة بعيد عن ساعات الذروة طبعاً ... وأحب أطمن الناس أن البنزين مشكلته اتحلت.... بس فيه مشكلة صغيرة.... الطرق والكبارى تحتاج إلى الكثير من التطوير واحنا فى بلد وحدة فــ مفيش مانع من زيادة الموارد علشان كده فكرنا بسرعة فى ضريبة صغيرة... هنسميها ضريبة المواطنة.... وكل سنة وأنتم طيبين...