هناء درويش 20 سنة، تعيش فى بولاق الدكرور لها ثلاث أخوات بمختلف المراحل التعليمية، حاصلة على المركز الأول والثالث على التوالى فى بطوله الشرق الأوسط للأولمبياد الخاص لكرة السلة بدبى وأبوظبى.
بابتسامه رقيقة تملأ وجهها قالت «بدأت لعب رياضة وأنا عندى 13 سنة وبدأت رياضه الجرى 400 متر فى ملعب المدرسة وأخدت المركز الأول ولعبت سلة 5 سنين واترشحت للسفر علشان أشارك فى الأولمبياد الخاص مع 8 بنات، وأخدت المركز الثالث فى أولمبياد الخاص سنة 2006 بدبى، و2008 أخدت المركز الأول فى الأولمبياد الخاص بأبوظبى.ونفسى أسافر تانى لأنى حبيت السفر قوى، علشان بعرف حاجات جديدة وبتعرف على أصحاب جدد، ده غير إن الناس بره لما بيعرفوا إننا من مصر بيفرحوا بينا قوى».
وعن عائلتها تقول هناء: أمى لم تكن تعرف أنى هكون كده وهى حتى ماكنتش تعرف إنى مش طبيعية فى سنة أولى ابتدائى، كانت بتفضل تضربنى لحد ماعييت وأصبت بمرض الصرع بس أساتذتى نصحوها تودينى مدرسة للتربية الفكرية وفعلا وهى حاليا بتقول عليه ما شاء الله بنتى شاطرة ومتميزة».
وانتهت هناء من حكايتها بقولها «أنا بحب الرسم والألوان وشغل التريكو والتطريز والسفر والرحلات وكرة السلة» وأنا مشتركة فى جمعية رسالة وبعمل رسومات حلوة قوى هبقى أوريها لكم.
