فيسبوك
واتساب
ماليش فى الكلام ده
ومعرفش فيه
لى فى الشعر وبس
لو تحب اسألنى فيه
أقولك كام قصيدة كتبها نزار
وكل كلمة حلوة كتبها جاهين
اقولك ع الليالى
وع الغناوى
وع القلوب العطشانة حنين
أقولك ع الشعر المسافر من سنين
فين رايح وفين عايش وليه حزين
أوعى تفكر إنى فيلسوف
أنا لسه بحاول اتعلم
لسه بتهجى فى الحروف
لسه يا صاحبى بنحاول
تقبلنا بلاد الشعر ضيوف
مالناش حق الإقامة
ولا حق المبيت
لسه قدامنا كتير
على ما نطلع بطاقة
ويبقى لنا بيت
إحنا فين والشعر فين
إحنا غلابة قوى
بنحاول نتعلم
وطريق الشعر طويل
وياما فيه حنتألم
قلت لحبيبتى إمبارح كلمتين
قولت لها بحبك مرتين
ومشيت
هى كده الأيام
عذاب وشقى وحبة غرام
