رنا عبد الحكيم تكتب: دراما رمضان.. ملاحظات بسيطة

رمضان خلص وكل سنة وإحنا طيبين، وكالعادة المسلسلات والبرامج كانت كتير أوى لدرجة إن فى ناس كانت عاملة إضراب السنة دى، وحلفت إنها مش هتشوف أى حاجة، ودى بعض الملاحظات البسيطة على التلفزيون بشكل عام فى رمضان:

السنة دى كان فيه حملة إعلانات للبنوك ملفتة للنظر أوى غلبت حملات السمن والزيت!!

لسه ظاهرة حشر الإعلانات بين البرامج والمسلسلات موجودة، وزادت بشراسة السنة دى لدرجة الواحد ممكن ينزل يروح مشوار ويرجع لحد ما الإعلانات تخلص ويرجع يكمل المسلسل عادى جداً من الجزء اللى وقف عنده!!

برامج الكاميرا الخفية والتريقة على الناس زادت أوى السنة دى، وتحس إن الفبركة بقت عينى عينك كده!

عجبنى فكرة أن مسلسل "ونيس وأحفاده" فى تتر النهاية بيذكر أسماء الممثلين اللى توفوا وبيحيى ذكراهم، لفتة جميلة من فارس اسمه محمد صبحى.

مفيش مسلسل يلفت النظر السنة دى، كل مسلسل بيكرر نفسه بجدارة الصعيدى هو الصعيدى والمصلحة الاجتماعية لسه مصلحة اجتماعية وحتى المحامى اللى دمه خفيف متغيرش!!

فى وجه جديد اسمه هبه مجدى بجد كانت فاكهة رمضان السنة دى، عملت 3 أدوار أحلى من بعض.

مباراة تمثيل أكثر من رائعة بين فاروق الفيشاوى وحسين فهمى فى مسلسل"قاتل بلا أجر" أمتعتنا فعلا.. وللحديث بقية.