فيسبوك
واتساب
ساعة العصارى
لأنك منى و كأنك كأنى
حلمك تشوفه و تفسيره عندى
فى ساعة عصارى و فنجان شاى
تعالى وقوللى بتحلم بإيه
بتحلم بشمساية طالة فى يناير
فى برد الشتا فى وسط الغيوم
شمسك ايديا تدفيك فى طوبة
ولا كهربا و لا يحزنون
و كمللى حلمك هيحلى الكلام
قوللى كمان بتحلم بإيه
بتحلم بليل بقمرة بنجمة تكون لك دليل
ليلك فى شعرى يا مالك مشاعري
و قلبى دليلك ينور طريقك
يكون لك رفيقك لاخر الطريق
و كمللى حلمك هيحلى الكلام
قوللى كمان بتحلم بإيه
بتحلم ببحر له موج ماله صخر
و موجه حنين يشيلك لفوق
موجه فى عنيه ركز شوية
هتلقى بحورك و موجها الحنين
ساعة مغربية
بس اوعى تغرق ده بحرى غريق
و كمللى حلمك هيحلى الكلام
اشرب شايك و كمل اوام
قوللى كمان بتحلم بإيه
بتحلم ببكرة جديد ماله ذكري
شايلك امانى و فرح و اغاني
و مفيش جرح تاني
بكرة معايا مليان امانى
و اذا كان على الاغاني
هتسمع غنايا و يحلى الغنا
و خللى فرحك عليا انا
و كمللى حلمك هيحلى الكلام
قوللى كمان بتحلم بإيه
بتحلم ببيت صغير اكيد
و مليان حب و مليان دفا
وعيلة و لمة و صدق ووفا
بيتك فى قلبى سكنته انت قبلي
هواه بحرى قبلي
وهتلاقى فيه الحبيبة الوفية
وأكون لك عيلتك
اختك وبنتك وأمك وأبوك
و كمللى حلمك هيحلى الكلام
قوللى كمان بتحلم بإيه
اقولك بقى ده حلمك مطول
و انا عايزة احلم و فسرلى انت
ياللا يا همام عشان عايزة انام
ولما ابقى احلم هبقى احكيلك
وفسر لى حلمى
ودلوقت بقى أقولك سلام
