طبعة ثالثة من ديوان "كليك شمال"

صدرت عن دار ملامح للنشر الطبعة الثالثة من ديوان العامية "كليك شمال" للشاعر عادل سلامة، بعد نفاد الطبعة الأولى من الديوان والتى صدرت منذ أقل من عام.

جدير بالذكر أن كليك شمال هو الديوان الثانى لعادل سلامة بعد ديوانه الأول "الحب فى الجامعة".
من أجواء الديوان
مصر أجمل مطربة صوتها كان مالى الرداوى
فى القهاوى وفى الحارات
كل حتة بتمشى فيها بتلاقيلها بوسترات
نجمة جامدة مافيش كلام
ع المسارح.. واقفة وقفة فيها عزة وانسجام
كل كل المطربين كورس وراها
تفتن العشاق باهة تاخد الإحساس معاها
وأما تسكت لحظة بتقوم القيامة
تبتسم نص ابتسامة تبتسم كل الأماكن
تندمج وعنيها تلمع تلقى كل الدنيا تدمع
هى جاية الدنيا بس عشان تقول والباقى يسمع
هى فين راحت صحيح
ماتت ؟. ماظنش مستحيل
قررت فجأة اعتزالها؟
برضه لأة.. مش ده حالها
طب وفين جمهورها راح
من زمان ماسألش عنها
اختفاؤها فجأة بيخليها عرضه للإشاعة
والخبر مالى الجرايد والمواقع والشاشات
من ييجى ساعة
ليه ماجتش بنفسها علشان تكدب كل ده
حد عنها يقول كده؟
إيه شعورك لما كل الدنيا دى تقرأه معانا