سيد أبوحفيظة: اشتغلت مدرب للمنتخب بس لما وجودى أثّر على نفسية حسن شحاتة انسحبت.. قلت أغنى زى شعبولا وسعد الصغنطط منفعش.. ماكنش فيه قدامى غير إنى أبقى وزير داخلية

◄لما اشتغلت فطاطرى باب وشباك قلت: أبطل «لت وعجن» لأن الطريقة دى «بيتزات» بتخلى الزباين تقعد «تتفرد» وتتنى.. وأنا بطبيعتى ماليش فى اللى بيتنى بصراحة
ودارت الأيام، ومرت الأيام، وترك الإعلامى الأشهر سيد أبو حفيظة الحقل الإعلامى، بعدما اكتشف أن الحقل السليم فى الجسم السليم، ههههههههههه، وحتى لا تحدث مشكلات طالب بحقل الدماء، ههههههههههه، خاصة بعدما اكتشف أن كل حقول مصر يتم ريها بمياه الصرف الصحى، رغم ارتفاع أسعار الصرف، ههههههههههه، اعترض فى البداية على تسميته بالصحى رغم تسببه فى الكثير من الأمراض، وحين لم يوافق المسئولون على تغيير الاسم إلى الصرف غير الصحى، نقحت عليه أمانة الكلمة، وقدم استقالته على ورقة بردى، فقالوا له: كده بردى يا سيد؟، ههههههههههه، وقبلوها، ومن يومها يا حبة عين والدته وهو يتلطم فى مهن مختلفة، لكن الكاميرا ظلت ترصده فى كل منها، لتكشف الحقائق لجمهوره الغفير، غفير العمدة، ههههههههههه، ما هو أول قرار اتخذه بعد توليه مهام كل مهنة، وأغرب موقف تعرض له فيها وكيف خرج منه، ولماذا قرر أن يتركها، والمهنة التى حلم بأن يعمل فيها بعدها؟
سيد أبوحفيظة سائق توك توك
أول قرار خدته؟
إنى أعمل «توك توك شو» اشمعنى كبار الإعلاميين عاملين «توك شو» فقلت أبدأ من حيث انتهى الآخرون، فقررت أعمل «توك توك شو» أناقش من خلاله هموم الغلابة اللى بيركبوا معايا ومش لاقيين حد يتكلم عنهم.

أغرب موقف اتحطيت فيه وخرجت منه إزاى؟
لما ركب معايا أحد المسئولين وقاللى: القطامية هايتس وحياة أبوك يا أسطى، وخرجت من الموقف ده بأنى عملت نفسى ماسمعتش كويس ورحت طالع بيه على عشوائيات الدويقة فى التلاتات فوق، عند ورشة أشرف بتاع الردياتير لاقيته بيقولى: إيه ده!! الحتة دى عندنا فى مصر قلت له: لأ، الحتة دى عندنا إحنا فى مصر.

ليه قررت تسيب المهنة دى؟
عشان التوك توك ولا مؤاخذة مافيهوش مارشدير، يعنى ما بيرجعش لورا، وأعتقد إن ده الحاجة الوحيدة فى مصر اللى ما بترجعش لورا وبعدين لحد دلوقتى مش راضيين يعترفوا بيه ويطلعوا له تراخيص، وأنا بصراحة أحب أمشى فى السليم ولا مؤاخذة.

طب دلوقتى إيه أكتر شغلانة نفسك تشتغلها؟
نفسى يبقى ليا كلمة، نفسى لما أتكلم أتسمع، أنا بقالى سنين بتكلم، تقولش أخرس، ولا كلمة طلعت من بقى وحسيت إنها وصلت لحد أو حد حس بيها، بصراحة كده أنا نفسى أبقى مسئول كبير.

سيد أبوحفيظة وزير داخلية
أول قرار خدته؟
لأ، مقصدش كبير أوى كده، لكن لو فرضنا، هاعمل اجتماع كبير أوى أوى فى أى حتة أرض فاضية من بتوع التجمع الخامس لكل اللى اسمهم «طارق» فى البلد عشان نشوف حل فى قانون «الطوارئ».

أغرب موقف اتحطيت فيه وخرجت منه إزاى؟
إن الاجتماع متعملش، لأنهم قالوا لنا إن اجتماع أكتر من 3 أشخاص يبقى «تجمهر» ولازم موافقة أمنية، وخرجت من الموقف ده بأنى أخدت 3 «طارق» منهم وقعدت بيهم فى البيت عندى، بس المدام قالتلى إن اجتماع أكتر من 3 أشخاص عندى محتاج «جبن فى التلاجة» فأخدتهم ونزلنا قعدنا على قهوة السوايسة فى الكوربة.

ليه قررت تسيب المهنة دى؟
عشان أنا والـ 3 «طارق» معرفناش نوصل لحل.

طب دلوقتى إيه أكتر شغلانة نفسك تشتغلها؟
نفسى أبقى مدير لأكبر فئة موجودة فى مصر، بصراحة نفسى أبقى مدير مستشفى المجانين.

سيد أبوحفيظة مدير مستشفى المجانين
أول قرار خدته؟
قدمت طلب علشان آخد قطعة أرض مساحتها 2 مليون متر مربع عشان ابنى عليها مستشفى مجانين جديدة تستوعب كل المختلين عقليا اللى بيحرقوا القطارات والمسارح ويوقعوا العمارات فوق أهلها ويغرقوا العبارات ويستوردوا قمح فاسد ويستغلوا فى الغلابة.

أغرب موقف اتحطيت فيه وخرجت منه إزاى؟
إن المستشفى مكفتش عدد الناس دى، وخرجت من الموقف ده بإنى أصدرت قرار إننا نقول إننا محتاجين 10 أضعاف المساحة دى.

ليه قررت تسيب المهنة دى؟
لأنى بدأت وأنا نايم أعض لسانى وبدأت وأنا صاحى تنزل رغاوى بيضا من بقى، فحسيت إنى لو كملت هاتجن.

طب دلوقتى إيه أكتر شغلانة نفسك تشتغلها؟
نفسى أشتغل فطاطرى باب وشباك.

سيد أبوحفيظة فطاطرى
أول قرار خدته؟
إنى أطبق مبدأ الشفافية مع زباينى وأبطل «لت وعجن» طول ما أنا واقف لأن الطريقة دى «بيتزات» بتخلى الزباين تقعد «تتفرد» وتتنى عليك وأنا بطبيعتى ماليش فى اللى بيتنى بصراحة.

أغرب موقف اتحطيت فيه وخرجت منه إزاى؟
أغرب موقف إنى أول يوم فى افتتاح المحل جالى زبون طلب فطيرة باللحمة قولت له لا والله مابجبش لحمة عشان أنفلونزا الخنازير، قالى طب اعملهالى بالفراخ قولت له لا والله مابجبش فراخ عشان أنفلونزا الطيور، قالى طب اعملهالى بالتونة قولت له لا والله مابجبش أسماك خالص عشان بتتربى فى مزارع فيها ميه الصرف الصحى، قالى طب اعملهالى بالخضار قولت له لا والله مابجبش خضار عشان مرشوش، قاللى أومال إنت فاتح ليه؟، قولت له عشان أشوف وشك السمح ده.

ليه قررت تسيب المهنة دى؟
عشان ضغط الشغل كان كتير أوى بعد كل اللى قولته ده.

طب دلوقتى إيه أكتر شغلانة نفسك تشتغلها؟
نفسى الناس ما تحسش بألم علشان كده نفسى أشتغل طبيب تخدير.

سيد أبوحفيظة طبيب تخدير
أول قرار خدته؟
إنى منعت «البنج» من المستشفيات لإن الناس بتيجى متخدرة لوحدها، بس مدير المستشفى اعترض وقاللى: «ماينفعش مستشفى ميبقاش فيها بنج»، رحت جايب مضربين «بنج»، وحاططهم فى الدولاب عشان لو مدير المستشفى جه يمر، واهو برضه رياضة، لو مفيش عمليات ألسع د/ حسام بتاع النسا والولادة جيمين بنج فى السريع وأعلمه الأدب.

أغرب موقف اتحطيت فيه وخرجت منه إزاى؟
أغرب موقف لما جالى واحد لسه خسران فلوسه كلها فى البورصة وقاللى عايز أركب دعامات فى القلب وقولت له إننا مابنديش بنج، قاللى مش مشكله الهم اللى الواحد شايفه مبنجنا خلقة، وصلناه على جهاز رسم القلب، لاقينا شاشة الجهاز مكتوب عليها، هبوط حاد لمؤشر داون جونز!!

ليه قررت تسيب المهنة دى؟
د/ حسام قعد 4 شهور يغلبنى متواصل، ومقدرتش استحمل الوضع.

طب دلوقتى إيه أكتر شغلانة نفسك تشتغلها؟
نفسى أحقق حلم كل المصريين فى الوصول لكأس العالم نفسى بصراحة أدرب منتخب مصر لكرة القدم.

سيد أبوحفيظة مدرب منتخب كرة القدم
أول قرار خدته؟
أولا: سرّحت اللاعيبة الحالية للمنتخب وجبت شوية شباب من على الفيس بوك وبدأت أشتغل عليهم من أول وجديد لإن العيال بتوع الفيس بوك اللى فاهمة فى التكنولوجيا دى أكيد هما أمل مصر الوحيد.
ثانيا: بما إنى مابفهمش فى الكورة بدأت أدربهم من الباطن، بمعنى إنى استعنت بأبويا بما إنه كان لاعب سابق بنادى الزمالك ومدرب مخضرم ففهمت منه الليلة بتمشى إزاى ووقفت أنا أزعق وأشخط فى اللعيبة، وأردد الجمل اللى قالها لى أبويا بالظبط عشان ماتكشفش.

أغرب موقف اتحطيت فيه وخرجت منه رزاى؟
إنى بعد ما جبت الشباب دى اكتشفت إنهم كلهم رجليهم الاتنين شمال، فكانوا بيقعدوا يلفوا حوالين نفسهم وما بيعرفوش يجروا لقدام، وفى الآخر بيدوخوا ويرجعوا ويقعوا على الأرض، وخرجت من الموقف ده بإنى أقنعتهم إنى أدربهم باليه مائى وهما وافقوا وعملت فريق راس البر كله كان بيتكلم عنه، انزل إنت بس راس البر وقول «فراشات مصر» ألف من «يبلك».

طب ما إنت كنت ماشى كويس أهوه.. ليه قررت تسيب المهنة دى؟
لأنى حسيت إنى بدأت أشكل خطورة على حلم كل مصرى نفسه نوصل لكأس العالم وبعدين بصراحة حسيت إن وجودى مأثر على نفسية الكابتن/ حسن شحاتة فكلمته وقولتله ربنا ما يجعلنا قطاعين أرزاق، من بكرة تيجى يا كابتن تشوف منتخبك وشدوا حيلكوا يا رجالة وقفلت التليفون وقعدت أعيط لوحدى.

طب دلوقتى إيه أكتر شغلانة نفسك تشتغلها؟
نفسى أشتغل مندوب مبيعات مسحوق غسيل.

سيد أبوحفيظة مندوب مبيعات مسحوق غسيل
أول قرار خدته؟
أنضف البلد.

أغرب موقف اتحطيت فيه وخرجت منه إزاى؟
وأنا بنضفها لاقيت للأسف بقع ما بتطلعش ومترسخة فى نسيجنا وعايزة الوساخة تفضل موجودة عندنا للأبد، قولت أحط زهرة عشان تبيض اللى تقدر عليه، قطفوا الزهرة ورموها على الأرض وداسوا عليها كمان، فقولت يبقى مفيش حل غير إنى أوجه رسالة لكل «نظيف» استحلفه فيها إنه يطهر المكان اللى هوه فيه عشان نعرف نعيش وإحنا أنضف.

ليه قررت تسيب المهنة دى؟
عشان اكتشفت إن مفيش مسحوق غسيل ههيعمل حاجة لوحده. لازم نية النضافة تكون موجودة الأول.

طب دلوقتى إيه أكتر شغلانة نفسك تشتغلها؟
نفسى اشتغل مطرب شعبى زى الأستاذ شعبان عبد الرحيم والأستاذ سعد الصغنطط والأستاذ بعرور وأشتهر وأحيى أفراح فوق السطوح عشان أفرح الناس الغلابة.

سيد أبوحفيظة مطرب شعبى
أول قرار خدته؟
إنى أعيد توزيع كل أغانى المرحوم «مايكل جاكسون، نجم البوب الأمريكى» وأعبيها فى شريط ينزل السوق باسم «سيد أبوحفيظة، نجم البوب كورن المصرى» ويبقى اسمه «يا ما دقت عالراس طبول».

أغرب موقف اتحطيت فيه وخرجت منه إزاى؟
كانت الغنوة كلماتها بتقول:
ياما دقت على راسنا طبول والفاعل خلوه مجهول والمسئول وبقدرة قادر فى ثوانى بقى مش مسئول
ياما وقعت على راسنا بيوت والعبارة فى بطن الحوت
والمسئول لقى لندن بايخة راح نازل فورا بيروت
ياما غرقم فى بحورنا شباب والمسئول علشان كداب
راح قايل ما هى مش شرعية والموت مش محتاج أسباب
ياما نفسى أشوفك مبسوطة مايرشوش لا خيار ولا قوطة
و مفيش تانى غاز يتصدر ويروح لـ ولاد «الـ ......».
بس الرقابة ما وافقتش على الشريط ده واعترضت على كلمة «قوطة» قلتلهم اشمعنى الكلمة دى قالولى عشان ممكن تتفهم إنك بتتريأ على المواطن اللى طافح «القوطة»، قلت يبقى مفيش قدامى «خيار» تانى وقمت عامل حفلة على المسرح الرومانى بمارينا وغنيت الأغنية فيه وعملت اللى فى دماغى برضه.

طب ليه قررت تسيب المهنة دى؟
لإنى لاقيت «تامر حسنى» كان متفق مع مايكل الله يرحمه أنه هيعيد توزيع أغانيه، فقولت فى عقل بالى انسحب ياد يا سيد بهدوء وخليك ذكى وماتخسرش جيل كامل.

طب دلوقتى إيه أكتر شغلانة نفسك تشتغلها؟
نفسى أبقى زى «بيل جيتس» ميكانيكى كمبيوترات رجالى

سيد أبوحفيظة مهندس كمبيوتر
أول قرار خدته؟
إنى أفيرس الفيس بوك جروب بتاع جورج بوش عشان ميعرفش يفتحه ولا يعمل add لحد ويموت بحسرته، وبعتله فيروس بنى برباط مقاس 44.

أغرب موقف اتحطيت فيه وخرجت منه إزاى؟
إنى لاقيته حاطط «أنتى فيروس» رحت باعتله ماسدج قولتله فيه وإيه يعنى ما أنا كمان «أنتى» فيروس، مش إنت لوحدك اللى «أنتك».

ليه قررت تسيب المهنة دى:
علشان الأمريكان بعد الرسالة اللى بعتها لجورج كهربولى البروسيسور وربطونى من رجلى بكابل الداتا وربطوا الكابل فى توك توك ونزل على التيتر أغنية «الهارد لو عطشااااااااانة».

طب دلوقتى إيه أكتر شغلانة نفسك تشتغلها؟
نفسى التحم مع الناس أكتر وأتواجد فى أضيق مكان فيه أكبر عدد من الناس فى وقت واحد، بصراحة نفسى أبقى محصل فى أتوبيس نقل عام.

سيد أبوحفيظة محصل فى أتوبيس نقل عام
أول قرار خدته؟
إن تذكرة الأتوبيس تبقى مجانية، وكل تذكرة عليها تذكرة هدية كمان عشان المواطن الغلبان ده وهوه راجع من مشواره ما يتكلفش مليم أبيض، بالإضافة إلى أن أى حد هايعمل اشتراك سنوى هايحصل على قسيمة شراء بمبلغ 500 جنيه لأرقى محلات العطور لاقتناء أفخر أنواع مزيلات العرق، عشان الغلابة اللى هيركبوا معاه طول السنة دى مالهمش ذنب برضه .

أغرب موقف اتحطيت فيه وخرجت منه إزاى؟
أغرب موقف لما لاقيت راجل محترم قوى طول بعرض واقف بيتحرش بست محترمة واقفة قدامه فرحت أطرده بره الأتوبيس عشان بيتحرش بيها قاللى: أنا كنت متخيل إنها «هايفا» وكنت بطمنها.

ليه قررت تسيب المهنة دى؟
عشان الهيئة بعتتنى أشتغل محصل فى الـ cta فقولت إلا الشغلانة دى ورفضت بس أجبرونى أشتغل وفى أول يوم ليا فى الأتوبيس المكيف وأول ما الأتوبيس وقف فى أول محطة لاقيت عيال صغيرة فى الشارع بيبصولى وبيضحكوا وراحوا مغنيين «إيرياااااال، إيرياااااال، هوه هوه»

طب دلوقتى إيه أكتر شغلانة نفسك تشتغلها؟
نفسى أقعد فى بيتنا كافى خيرى شرى وأتابع مصر من البلكونة. وكل سنة وإنتوا طيبين،
ورمضان كريم.

لمعلوماتك...
أكرم حسنى المتخفى فى ثياب أبو حفيظة:
أكرم حسنى عبدالرحيم
متزوج ولديه بنت اسمها «ربى» عمرها عامان. (ربنا يخليهاله).
ليسانس حقوق دفعة 92، دراسات عليا إعلام القاهرة، ووصل لتمهيدى ماجستير، ولكن لضيق الوقت مكملش. (معلش.. العلم فى الراس).
يعمل مذيعا فى «نجوم إف إم» منذ 5 سنوات.. دخل المحطة من خلال مسابقة «راديو ستار»،.. كان بيسمع الراديو وفجأة سمع جملة: «لوعايز تبقى مذيع فى نجوم إف إم اتصل»، فقرر يتصل من باب التجربة واتصل ونجح. (الحمد لله.. وإلا كان فِضِل يسمع الراديو بس، ومكانش متعنا لا ببرامجه ولا بنشرة أخباره).