فيسبوك
واتساب
ياريت أبويا كان ميت
ياريت أمى كانت قالت
أملِّى اسمى للأبلة
هدوم العيد كانت حلوة
وأخدت عينى م الحصة
وكان لسة بيبدأ قلمى ف كتابته
لأول سطر ف الإملا
"بلدى سعيد.. وطنى مجيد
وحبه ملأ الفؤاد والبلاد والوريد
وليس فى وطنى حزين أو مهان أو شريد"
كراستى شبطت ف القلم
وإيديه عجزت تنقله السطر الجديد
وسمعت صوت أمى بتصرخ من بعيد
قرب قوى الصوت وحضن أمى
اللى سكِّت كل دوشة فصلنا
نزلت دموع أمى على خد الورق
باش الورق ساح الكلام
ضرب الجرس
ولقيت لسانى اللى انخرس طول الحصص
عمال يلاحق ف الجواب
اللى انحبس فى صوت كسير
أبوكى مات
حاضنة إيديه مهرة السلف
قابضة على قروشه اللى نقرشها بدمه ودمعته
تحت العجل فوق الهموم
رافضة انفراجة قبضته
غير إلا لبتاع الهدوم
هدوم العيد
