فيسبوك
واتساب
خالد عز الدين - 41 سنة - رئيس تحصيل بشركة الكهرباء
لسه مجهزناش نفسنا لرمضان، الموضوع محتاج فلوس كتير، وإحنا لسه جايين من المصيف، ورمضان جاى مع دخول المدارس يعنى موسمين مع بعض، بس رمضان شهر كريم.. وبييجى بالخير دايما، وربنا بيطرح فيه البركة.
فريد بهجت - 34 سنة - محامى بشركة كليوباترا
الطبيعى إننا نستعد لرمضان طبعا، بس الكام سنه اللى فاتوا، والسنادى خصوصا الدنيا بقت صعبة أوى، الأسعار بقت نار.. ورمضان داخل مع المدارس والأعياد.. يعنى مصاريف مضاعفة.. بس الواحد بيعمل حسابه فى قرشين، أو بياخد سلفة من الشغل، والحمد لله، ربنا يسهل و«بتمشى».
سيد حمدى - 55 سنة - سائق بالمعاش
هاقول إيه، معانا ربنا.. أكتر من كده مفيش.. أنا مريض بالسكر والقلب ومش باشتغل.. وعايش على مساعدات أهل الخير والجمعيات الشرعية، والحمد لله عايشين، ربنا مش بيسبنا فى الأيام العادية، يبقى هيسبنا فى شهر الخير يعنى؟!
بسام حسنى إبراهيم - 32 سنة - مشرف أمن
المسألة فى الأول وفى الآخر بتبقى أرزاق.. أنا مش بحسبلها بصراحة، رغم زيادة الأسعار والغلا اللى إحنا فيه ربنا بيسهلها، ساعات بييجى رمضان عليا ويبقى معايا فلوس، وآخد عليها مكافآت من الشغل مكنتش مستنيها، وساعات مش بيبقى فى حاجة زيادة، بس فى كل الحالات ربنا بيسهل والشهر بيعدى زى كل سنة.
