عبد الرحمن فهمى يكتب..عصفورتى

عصفورة قدامى ومعششة
على شجرة ليمون
بتلاغى وليفها ومتبغددة
شطورة تشفنى مهموم
تغنى حزينى وتفضل
ف بيتها زعلانة ومنكدة
فرحان.. تطير على شباكى
تغنى وترقصلى
كده وساعات كمان كده
تصبح عليا يوماتى
وتزورنى على شباكى
وتحكيلى عن مصر
كل كلامها كان!!
كان عندنا دكان
قدامه بيت فنان
كان الغنى إنسان
وجاره الفقير فرحان
كان الخجل للواد
تمام زى البت
كان عندى جد جميل
علام وبيعلم
تحب تسمع صوته
يوماتى ف الترتيل
ويوم ما يغضب منك
يلعن مين.. أبو شطانك
ويقولنا لسانك حصانك
وإن صنته أكيد صانك
فين مصر يا ماضى
باعوا خلاص الأرض
بكره يبيعوا سماك
فين مصرنا يا ناس
ضاع العلام منا
وضيعوا الكراس
فين زرقتك يا نيل
فين عشاقك
فين غنا المواويل
فينك يا شيخ موسى
فين خطبتك ف الجامع
فين ناجى وعم علاء
ومعاهم أحمد
وعبده شقيق نوسة
فين الأصالة والشهامة
معقولة دلوقتى
دكتور يعتدى على العيانة!!
ولا الصنايعى المجدع
يقتل جارته سميحة وأمها مرجانة
يا خسارتك يا أحلى مصر
ياللى كان وضعك زى أدان العصر