بكيت يوم ميلادى
وصمت عن الدموع
الأمل تملى صاحى
فى عيونى وفى الضلوع
أحلم والحلم يكبر
يبحر
فى بحر الأمل
ينبت كمركب وتزهر قلوع
تيجى موجة أو ريح القدر
يتكسر يتأثر
قلبى للحظة
ويرجع تانى يحلم
والحلم يكبر
يبحر
فى بحر الأمل
وتطلعله قلوع
بكيت يوم ميلادى
وصمت عن الدموع
البكا لو يتبكى
فى المبكى
شخصى اختفى
اتنفى
للحظة لما الحزن يخلص
ينتهى
والبسمة تطلع
دموع الحزانى تنقضى
تبتدى الحلوة تفصل
مالجدع مأصل
والحاجة تزغرد
والحارة تبرد
شربات فرح مقرب
مكهرب
بيوت الحارة زينة
نسينا مآسينا
والهم مفيش رجوع
بكيت يوم ميلادى
وصمت عن الدموع
هى كده حياتى
عشت عمرى فيها
فرحان يا صاحبى بيها
مغمض عن ماضيها
لو يجعلنى أبكى
حأحكى
عن ليلة ومش ناسيها
باديها
ماشى زى عادتى
والبسمة بتاعتى
بتسلم عالصحاب
ودياب
ودياب ده يبقى صاحبى
قاعد عالقهوة شوفته
سيجارته
هاتحرق صوابعه المرعوشين
وعينه فى جريدة
ما افتكرش تاريخها كام
فيها صورة
عينى جات عليها
بيها
اللحظة كانت مربكة
ارتعشت
ارتعشت وانتفضت
انفجرت بالبكا
اللحظة كانت مربكة
اتقتلت
كأنى حييت ومت
يمكن ألف مرة
الدرة
مقتول فى حضن أبوه
وخلفه الأقصى باكى بيصرخ
ياهووه
يا عالم يا مسلمين
يا عرب مكسفوين
محتاجين
منى ندهة ولا صرخة
ولا أعزم عليكوا
والنبى تيجوا تخلصونى
تنجدونى
بشىء غير غناكم بالأمل
والأمل مقطوع
بكيت يوم ميلادى
وما لليلة ديا مصاحب الدموع
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة