سيد أحمد الهمشرى يكتب:على سلم وزارة العدل

معقول فى العدل على السلــــــم الناس تتسحر على تمــــــــره!
ووزير العدل بيتفــــــــــــــــرج وشايفهم بالعين الحمـــــــــره!
مرسال واتنين خبطوا بابــــــــه ويقول للمرسال فوت بكـــــره
ازاى العدل هايتحقــــــــــــــــق ووزيره بيتهرب بــــــــــــره؟
فى مارينا راح زارها وصيـــف وقعد فى هواها واتكيــــــــــف
والناس من شهرين بتهاتــــــــى لا سمعهم ولا شاف بالمــــــره

.....
أمال العدل هنلقاه فيـــــــــــــــن لما وزيره أسبوع واتنيــــــــــن
مظاليم على بابه بتتعـــــــــــذب واقفين بولادهم من شهريــــــن
ولا حد نظر فى ملفاتهــــــــــــم ولا حد سألهم ليه واقفيــــــــــن
ولا لجنة سياسات سألتهــــــــــم ولا سألت باب العدل منيـــــــن
ويقولوا مصر هاتتقـــــــــــــــدم والمصرى بيبات ع السلــــــــم
خبراء من أعلى المستوايـــــات بعد الريس راح يشكوا لميـــــن

.....
مجلس للشعب بيعمل أيـــــــــــه صفوت وسرور فايدتهم أيـــــه
ونظيف وشهاب قافلين البـــــاب والناس شهرين بتدق عليــــــــه
قولوا لأحمد عز اتحرك فــــــــز رجال سياساتك ساكتين ليــــــه؟
مشغول بحديد وبفكر جديــــــــد والناس شايفه المر على إيديـــه!
والشرطه واقفه بعربيـــــــــــات جاهزه بعصايه وكلبشـــــــــات
والبلد اترهنت للبشــــــــــــاوات والظلم ركب وفرد رجليـــــــــه

.....
مش ممكن مصر هاتتقــــــــــدم لا بفكر قديم ولا فكر جديـــــــــد
وزراء حكومتنا مش فاضييـــــن فيها كل وزير عن شغله بعيـــــد
فيه واحد شغلاه مستشفـــــــــــى والتانى بيتاجر فى حديـــــــــــــد
والثالث عنده متين محلـــــــــــج والرابع عايز ماله يزيــــــــــــــد
والناس على لقمه بتتسابــــــــــق والرزق شحيح واللقمه بعيـــــــــد

.....
لا تقولى بكره ولا بعــــــــــــــده ولا بعد سنين راح تتقــــــــــــــدم
طول ما انت اسير ديكتاتوريــــه ووزير فى الحكم بيتعلـــــــــــــــم
ووزير بيسوقك بالكربـــــــــــاج لو شافك حتى بتتكلــــــــــــــــــــم
ووزير مشغول بفلوس ونفـــــوذ وحيتان فى التورته بتقســــــــــــم
وأنا وإنت كمان دايما ساكتيـــــن راضيين بالعيشه مذله وطيـــــــن
هاتطول واقفتنا فى مظاهـــــرات وتطول قاعدتنا على السلـــــــــم