بمناسبة أم الخلول
وملوحة ظابطة وكلام معقول
فرح العمدة اتنصب
وجرينا نلحق زفة بقرع الطبول
مظاهرة وانفضت
وكل الودان اتشدت
هيخاف لسانها يقول
كفاية كفانا كفاكم
وغيرها مين يقدر لسانه يطول
ياعز خالتى
وبيت نظيف فى مرايتى
أنا المسئول..غويت الفقر عمرى
وعشقت القمر ضلمة
وسكة سواد على طول
يا ميت خسارة يا صدقى
يا ميت وزارة
يا كدابين فى القول
ينعم عليكم بالخرس
زى الطرش ما صابكم
بلا دعوة من معلول
*********
مستحيل تكونى هيا
إنتى مين؟
إنتى أنا؟
إنتى الهنا؟
إنتى الوحيدة ؟
والأولى والأخيرة؟
طول الحياة طول السنين
إنتى مين؟
ومين هصدق بعد ظلمك
بعد ما غابت شمس الحقيقة
عن عيونك وبعد ظنك
بعد ما شافت عيونى غدرك
غبتى عنى
حتى ضلك والمرايا
سألونى عنك
إنتى مين؟
مشاركة
اضف تعليقاً واقرأ تعليقات القراء
مشاركة
