صلاح هدهود يكتب: العلقة بعد الزفة.. كده وكده

حاضر نعم طيب
okسمعا وطاعة وكمان
مش هعمل كده أبدا
ولاهسأل وأقولك ليه
صدقنى ياعمى.. وياسيدى
ياتاج راسى وسعادة البيه
ماكنتش أعرف أنك هاتزعل
وتقصف قلم بابريه
سماح النوبة وسيب أيدى
نويت التوبة وبعلنها
هاسمع وأفرفش
هاأسكت وأرقص وأطنش
وليه أكلضم ليه؟
هالعب بعيد واحسبها
أنا مين؟.. وفين؟
وآخرة دا كله أيه
رسالة وصابت فى الصميم
خلاص يافندم هاستقيم
ماهو غيرك أنت مفيش
ومهما نشوف ونعيش
أنت الكبير.. أنت الزعيم
وأحنا ولاد الأيه
سمعا وطاعة
ياراديو وإذاعة
مش هاكتب سياسة
وهابطل غلاسة
مش هاسمح لفكرة
ولانشرة من نكرة
تقول إنك قدرنا
وتنشر آخر خبرنا
إنك زمنااااااا
من زمن قبليه
تكبر ماتكبر
أو تقوم الساعة
اليوم وبكرة
ولاغيرك أبيه
حاضر نعم.. طيب
هاكتبها تاني
وأقول إشاعة
ماكانتش نخوة ولاهمة
ولاقصة شجاعة
سكتم يافندم
بكتمممم.. ودمتم
أحنا بتوعك
Ok وكل البتوع
سمعا وطاعة
ياصاحب البتاعة
هاشهد بانك راية
وارفعها
ومين منك يقدر يقول
بورييه