مهندس عبد الرحمن فهمى يكتب: فوانيس فوانيس فوانيس

هل شهر المكارم
والحب بيناتنا عامم
وجمال نهاره صيام
وقبل الأدان قرآن
وهدوء وسكون
ونناجى فى الرحمن
الله يا شيخ رفعت
تقولش صوت كروان
ولا النقشبندى الصادح
لنبينا كتير مادح
والحاجة فى المطبخ
بتحضر لنا اللقمة
واخده ثواب م الكل
لتعبها والهمة
والعيلة ملمومة
وقبل الأدان بثوانى
إيدينا مرفوعة
طالبة من الرحمن
يبارك لنا فى اللمة
ويشفى لنا العيان
وكل دعوة منا
طالعة السما ومرفوعة
وبعد التسمية والشكر
بدأ الفطار بالتمر
ومافى بيناتنا قلب
إلا فى حالة ذكر
وروحنا للتراويح
وف ايدنا أولادنا
وكل واحد جنبك
تسمع كده منه
حلاوة التسبيح
ورجعنا كده شاكرين
وللفقير عاطيين
ودخلنا عند الحاجة
فينها القطايف ياله
احسن خلاص واقعين
جانا السحور
وبعد طبق الفول
كلنا زبادى
قبل الأدان على طول
وشربنا وراه الشاى
وقمنا نتهجد
وقبل الأدان بنسبح
ولربنا نتعبد
محلاك عمنا رمضان
يا درة الأيام
فيك الصيام
وفيك القيام سيان
كل عام وأنتم بخير