العميد محمود قطرى:جبل الدويقة يعلن وفاة مصر

الجبل وقع يا مصر.. الله يلعن دا عصر..
عصر الميت هزيمة من غير ولا نصر..
عصر الفبركة والهمبكة وضعف النفوس..
وكل واحد مقتدر عمّال يدوس..
على حتة فيكى والتمن حبة فلوس...

كله بيغرق فى السفينة.. ومعدش فيه إيدين أمينة..
عنبر التعليم بقا كله ميه وطينة.. وعنبر الصحة عملنا البحر طحينة..
أما الأمن.. بقا أمن ريا وسكينة..

دا الجبل ما وقعش أيام اليهود.. ولا فِ يوم أصحاب الأخدود..
ولا فِ عهد نوح ولا صالح ولا هود.. وقع بس النهاردة وقع فى اليومين السود

يلا يا حلوة.. استعدى للغرق.. مجلسى الشعب والشورى انحرق
وإللى هبش هبش.. وإللى سرق سرق..
بطاقتك فين ضاعت منك.. وضاع كل الورق..


المركب كده داخلة فى عصور الظلام.. والموت ف قاع البحر آخر سلام..
مصر مش بس ماتت النهاردة بالئام.. ياخونة ياخدوا مين العم سام..
مصر ماتت من زمان.. ساعة ما اتمنع فيها الكلام..

ولو حتى بيكتبوا ورقة عزاكِ.. وعزانا برضه ما إحنا معاكِ..
كأنك ملكيش عزوة.. ومفيش حد وراكِ..
عمرو فتحك بخمس تلاف.. وهما من غير ولا واحد لابس كاكى..

وخبازتك حتكون يهودية.. فى الإعلان مكتوبة أهيه..
انتقلت للأمجاد السماوية.. دولة مصر العربية
بنت محمد وابن العاص.. وابن أمية..

أم الأزهر والإخوان والسلفية.. المشهورة بأم الدنيا..
الأخت الكبرى للعربان والسعودية..
نسيبة وحسيبة بر إيران والأكراد والدولة التركية
والدفنة فى جبال صهيونية الصبحية..
والعزا بالليل فى واشنطن وفِ تل أبيب وفِ كباريه طنط صفية
بالتلغراف.. الولة العبرية..
يخرب بيت الجهل ويخرب بيت حتى الحرية