قالو زى اوربا مفيش
خف وسافر لاجل تعيش
بنات ألمان وعيشه جنان
وقشطه هولندى بدل العيش
وكلمة شكرا طابع بوسطه
يسافر بيك من روما لمالطه
طبعاا ده غير التحابيش
مايهمكش سنين جارسون
او زبال ف شوارع لندن
او شيال ف مزارع بون
اوتوزيع جرانين ف فيينا
او شحات ف قهاوى ليون
احنى رقبتك وارمى شهادتك
قول لسنين تعليم ستاشر ميت باردون
ميت باردون يابلد شهادات
ابنك بسلامته بقى جارسون
وح يبعتلك م البقشيش
قالو زى اوربا مفيش
خف وسافر لاجل تعيش
عاجبك ايه ف بلدنا المره
عاجبك فول ع طول ميت مره
ولا المعده تقول بيب بيب
ولا اتوبيس مصارينه لبره
يقول للعالم سيب وانا اسيب
فاكر نفسك عالم ذره
القوه العامله مابتفرقش
بين المجرى وبين الجحش
بعد سنين ف طابور الهيئه
مش راح تلقى حتى النعش
شهادتك زى ورقة البفره
يفرق بس عليها النقش
خف ياعم وسافر بره
الحب لوحده مايصقفش
ولو ماسافرتش ماتلومنيش
قالو زى اوربا مفيش
خف وسافر لاجل تعيش
سافرت يامصر
ونن عنيه فوق ف الجو
بيعصر عصر
وف الطياره
شفت جمالك زى الشاره
ف راس النسر
وماطولش
نزلت كأنى نزلت الجنه
ساعات وتروس
وجمال مهووس
وجناين حته م الفردوس
فضلت مبحلق ف البساتين
لحد مانمت وجالى كابوس
ان الاتوبيس عاد بينا لمصر
وصابعى ف طرف الباب مهروس
صحيت مفزوع زى المجانين
قعدت ابص شمال ويمين
لقتينى لوحدى ف الاتوبيس
ولاقيت الجنه ع الصفين
شميت نفسى وريقى اتبل
لكن جوه عنيا خجل
حاولت اداريه
او اهرب منه بخفة ظل
لكن نفسى ماطوعتنيش
قالو زى اوربا مفيش
خف وسافر لاجل تعيش
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة