فيسبوك
واتساب
قوم يا مواطن خدلك دش
واعمل لدماغك ريفرش
وانزل شوف حالك متعيش
علشان مش ناقص
صدمات
عارفك متنرفز مضايق
حافظك لا مركز ولا طايق
مش وحدك.. ده محدش رايق
مبنخلصشى من
الأزمات
اصل الغلطة كانت غلطتنا
معرفناش نحسب حسبتنا
واحنا اللى اخترنا وأيدنا
وأدينا دخلنا
ف مغارات
يبقى المفروض بقى نستحمل
علشان احنا اللى بنستهبل
اسكت واقفل بوقك يا أهبل
يا تودينا
المعتقلات
ايه اللى بياخده اللى بيتكلم
غير كرباج على جسمه يعلم
يفضل ماشى ف نفسه يكلم
ايه دخلنى أنا
ف المتاهات
هى يا عم دى كل القصة
اوعى تكون مفهمتش لسه
أنا مش عايزك يوم بقى تنسى
إننا بنواجه
عصابات
بدر الهوارى - شاعر
