الشوق مسافر والعيون واقف على رموشها الندى
والغنوة درات نفسها لما الحنين رفرف جناحة وابتدى
يا قلب تاه منه الدليل يا بحر غاب عنه المدى
مين اللى سمى البحر بحر؟ مين اللى عارف قصته؟
والغربة ليه سده الطريق؟ والبحر وسعت ضحكته
****
يا قلب تاه منه الدليل
يا سكة غاب عنها المدى
السكة كان فيها شجر
وهدومنا فيها التلمذة
وأيدينا حاضنه الكراسات
نجرى نسابق بعضنا
نضحك يقع ورق الشجر ذى البساط
ونبص فجأة فى الساعات
نرجع وقدامنا المسا
والسكه تقصر كل يوم
والعمر يكبر كل يوم
من غير ما نعرف مين وفين؟
مين اللى سمى البحر بحر؟
مين اللى عارف قصته؟
والعمر يقصر كل يوم
والبحر توسع ضحكته
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة