فيسبوك
واتساب
يعنى مش عارف ليه كل واحد يسيب دينه ويلجأ لدين آخر يجرى على الإعلام يتصور ويعلن تركه لدينه إلى دين آخر أو ملة أخرى وكأنه بطل أو عمل شىء خارق للعادة.
يا أخى إحنا مالنا تعبد الله أو لا تعبده كنت مسلما أو أصبحت مسيحا أو العكس أو تريد أن تبقى بهائيا أو بوذيا أو ملكش ملة أحنا يخصنا أيه هو كل واحد مالوش دور فى الحياة عاوز شوية شوية يطلع ويعلن أنه ساب دينه وأصبح دينه كذا، ماذا يخص الناس فى هذا؟ .. الذى يحاسب البشر هو خالقهم فقط؟ ثم هل تنطبق السماء على الأرض لهذا الإعلان؟ هل يقل أو يزيد عدد المسلمين أو المسيحيين؟ أم هى سبوبة وجد فيها من يدعون أنهم إعلاميون ضالتهم واستغلوها أسوأ استغلال وبدلا من أن يريحونا من وجع الدماغ ده والوقيعة بين الناس وبعضها.. هات يا تحليل ويا مناقشات.. رجال دين وعلماء نفس يفتوا وهموم هنا وضعف هناك وقصص تقول إن فى جهة ما تريد أن تزعزع الأمن المصرى.
اسمحوا لى ما يروح يسلم يسلم واللى يتنصر يتنصر يبقى بهائى يبقى بوذى أو مالوش ملة يا أخى فى ستين "......".
هو فيه أيه الأمور دى بتحصل فى كل بقاع الأرض ولا حد حاسس بيها إلا شوية من أعلامنا الهمام. دوروا على أشياء أهم وأحسن من كل العبط ده متخلوش حد "...." تشهر على حسابكم.
أخشى ما أخشاه أن فى كل حارة أو شارع أو قرية مصرية يحصل تناحر بين الناس وده يقول لآخر هو أخوك أو أختك عمل كده عشان كذا أو كذا وتخرب مصر اللى ربنا قال فى كتابه الكريم "ادخلوها بسلام آمنين".
