المهندس عبدالرحمن فهمى يكتب:كل ما نمشى بنتكعبل

كل ما نمشى بنتكعبل
مره ف طوبه
ومره ف عيل نايم
جوات جوات نفسه
كان بيدور على نفسه
تاهت منه
كل ما نمشى بنتكعبل
ومره ف ناس بهوات
وكمان تجار بشوات
بس بتستهبل
كل ما نمشى بنتكعبل
ومره فى خوخه
مرشوشه سموم
ومره فى لحمه أو فرخه
محقونه هرمون
كل ما نمشى بنتكعبل
فى العسكرى الفاتح كل الإشارات
وسايب الدنيا تضرب تقلب
همه الأوحد يعبى الدفتر غرمات
وفضلة خيرهم حبة مخالفات
كل ما نمشى بنتكعبل
فى مدرس فاشل مرموق
بيعود ابنى يركب
من غير ما يسوق
كل ما نمشى بنتكعبل
دكتور سمسار
اعملى أشعه وكمان تحليل
وروح للبرج واعمل منظار
يا حكيم دا صباعى اللى واجعنى
يا حكيم خربت جيوبنا
ياحكيم هاتروح النار
كل ما نمشى بنتكعبل
دوا ومضروب
وكبير مغلوب
وشباب مسلوب
وبنات بالعرفى
بتضييع وتدوب
كل ما نمشى بنتكعبل
فى شبابنا الواعد
فى القهوه وقاعد
دا بيلعب طاوله
والتانى مع صحبه وشادد
كل ما نمشى بنتكعبل
ياكبير الحقنا
احسن لو عمنا
يبقى احنا غرقنا