لو أنتم مش عاوزين الأقباط فى مصر، خلاص نسيبها ونغور بره مصر.. لكن لازم نتفق الأول إنكم تبطلوا استعمال أى حاجة قبطية، أو أى كلام أصله قبطى، وحنشوف لو كنتم تقدروا تعيشوا من غيرنا، وزاى حياتكم الجاية حتكون هباب فى هباب، ولازم تعرفوا أننا لو رحنا فممنوع عليكوا استعمال الحاجات الجاية:
1- مفيش زغرطة فى الأفراح لأن الزغرطة عادة قبطية
2- أوعى العيال يقولوا وحوى يا وحوى فى رمضان لأنها كلمات قبطية
3- ممنوع أكل الطعمية المصرية الخضرة المعمولة من الفول والخضرة والكرات لأنها طعمية قبطية لكن كلوا الطعمية العربية المعمولة من الحمص
4- كسروا كل القلل اللى فى مصر عشان القلل كلها قبطية
5- أوعى تقولو الكلمات دى لأنها كلمات قبطية:
لبط (يعنى لوح)
نطع (يعنى دمه تقيل)
لكاك (يعنى بيتكلم كثير)
شملول (يعنى شاطر)
مهياص(دجال)
هجاص (كلامه فارغ)
أخنف (بيتكلم من مناخيره)
داده (مربية)
ياما (كثير)
6- وأوعى تعمل الحاجات اللى جايه دى:
تسخسخ (يغمى عليك)
لكلك (تخبط وزود فى الكلام)
أتكعور (وقع)
يوريه (يعنى ينتقم منه)
فكيك (يعنى يهرب)
7- ومتكلش الأكلات دى لأنها أكلات قبطية:
لقمة
مدمس
بصارة
بط
زلابية
سباطة بلح
سمك بورى
بساريه (السمك الصغير)
قوطه
8- أوعى تستعمل الحاجات دى:
الشونة (شونة التبن)
تضرب حد بالشلوت
تضرب حد بالشبشب
اوعى تروح مشوار
اوعى تقول الأكل باش
متستعملش الطرابيزة
ولا تركب حنطور
ولا تستعمل المبه (المصباح).
دى شوية حاجات ممنوعة على أى مسلم يقولها أو يستعملها لو عاوزينا نروح من مصر، ولو لسه مصممين على إننا نروح حقول لكم كلمات قبطى كتير وأعمال تانيه أكثر بكتير لأن اللى قلته ده مجرد عينه بسيطة، وأوعدكم إن حياتكم حتكون هباب فى هباب .
(بعض الكلمات القبطية الواردة بالمقال مأخوذة من مقال للأستاذ زكى شنودة فى مجلة كنيسة كاليفورنيا)
تم أضافة تعليقك سوف يظهر بعد المراجعة