نص حوار إبلاغ حازم لأبوالعلا قرار الاستغناء عنه

لم يكن أمر إبلاغ محمد أبوالعلا كابتن الزمالك بالاستغناء عنه سهلا، واحتار أفراد الجهاز الفنى وأعضاء مجلس الإدارة فى كيفية إبلاغ اللاعب بذلك، وتصدى حازم إمام عضو مجلس الإدارة لمسألة نقل القرار للاعب بحكم الصداقة القوية التى تربط بينهما، خصوصا أنهما كانا دائما السكن مع بعضهما فى غرفة واحدة طوال السنوات الخمس الماضية فى معسكرات الفريق.
«اليوم السابع الرياضى» رصدت الحوار الذى دار بين حازم إمام ومحمد أبوالعلا وجاءت تفاصيله كالتالى:
حازم إمام: إزيك يا أبو.. عامل إيه؟
محمد أبوالعلا: الحمد لله إزيك يا عضو مجلس الإدارة!
حازم إمام: محمد أنا كنت محرج أكلمك فى الأيام اللى فاتت ومش عارف أقولك إيه.. بس بصراحة المجلس خد قرار بعدم التجديد لك.
أبوالعلا: وإيه الأسباب بقى يا كابتن؟
حازم: بصراحة يا محمد الفريق ماخدش بطولات الأربع سنين اللى فاتت والإدارة رأت ضرورة تجديد دماء الفريق.
أبوالعلا: طب ما أنت كنت موجود يا كابتن ومخدتش بطولات.
حازم: بس إنت يا محمد ماكنتش بتلعب طوال الموسم الماضى.
أبوالعلا: وطب اللى لعب زى عبدالحليم عملتوا ليه إيه ما هو برضه استغنتوا عنه!
حازم: وبرضه يا أبوالعلا إنت لم تبادر بالتوقيع على بياض لتثبت رغبتك بالبقاء مع الفريق.. وطلبت فلوس كتير.
أبوالعلا: يا راجل ده محدش فيكم اكلم معايا فى فلوس ولا حتى قعد معايا.. يبقى فين طلبت فلوس كتير، وغير كده إنتوا عملتوا إيه للى وقع على بياض زى ما جمال حمزة عمل ومحدش فيكم عبروا.
حازم: المهم يا أبو العلا الموضوع ده لا يؤثر على الصداقة اللى بنا وإنت عارف أنى أنا بحبك أد إيه.
إلى هنا انتهت المكالمة التليفونية بين حازم إمام ومحمد أبوالعلا، فيما فسر الأخير أمر استبعاده عن صفوف الفريق لغيرة الكثير من داخل النادى من وجوده كونه من أحد اللاعبين القليلين أصحاب الصوت المسموع فى الحق، وله تاريخ كبير مع النادى ووصل لدرجة أن يكون كابتن الفريق وعمره 28 عاما فقط، وهو ما جعل مسئولىالنادى يخشون من تزايد نفوذه بالشكل الذى يجعله شوكة فى حلقهم.