فيسبوك
واتساب
خرجت تبص روس
حوالين الرقابى معلقة
خراطيم ع الصدور تدوس
بإيدين باردة و ميتة
فى جنب العيان تنغرس
وترمى شوية فلوس
* * *
يا خوانا أنا كنت راجل محترم
يضربونى مثال السخاء والكرم
غيرشى تعبى خلانى ع الحميد
واللى تييجى عليه الأيام يتفرم
* * *
أنا عمرى ما عملت ذنب كبير
يبلينى فى كبدى بسم خطير
المصيبة كانت جاية من عندكو
والعلة كانت فى حقنة الطرطير
* * *
عايز تعاين كبدى وتفعّص
بإيد ساقعة خلت قلبى يتقلص
يعنى انتو تدمرونى زمان ودلوقتى
يبقى الدفعة الجاية عليه ح تخلص
* * *
حاسب يا بنى مكان الألم
نفسى أصرخ والصرخة بتنكتم
مضطر اسيبك تقطع فى لحمى
لحم بنى آدم أنت فاكره عدم!
* * *
نفسى أشتمكم لكن إيه العمل ؟
مصاريف العلاج ضخمة لا تحتمل
بيعتنى الأرض والبيت والعيال
وديونى الكتيرة تهد الجبل!
* * *
يا سلام لو الميرى تخلص منّكو
أو الإنسانية تلاقى سكة لقلبكو
كنت أنام على سريرى من غير قلق
وما كنتش أدعى فى سرى" الله يهدكو"!
من جوه البلاطى البيضا
صورة أرشيفية
