خالد محمد 37 سنة عامل فى مطحن"بن"
عايز أرحب بـ أوباما، وأقوله إنى مبسوط بزيارته لمصر، وحاسس إنه هيغير كتير.. وأتمنى مايخيبش ظن الناس فيه، لأنهم معلقين عليه آمال كتير.
عمرو أحمد عبدالغنى 29 سنة فنى تحميض
أنا مبسوط جدا بزيارة أوباما لمصر، باعتبارها قلب العالم الإسلامى، لإن ده معناه إن الرئيس الأمريكى فاهم كويس إن مفيش علاقة بين الإسلام والإرهاب، زى ما كان بوش بيحاول إنه يقنع العالم.
محمد بحر 28 سنة مدير مسئول بمحطة بنزين
كلنا بنتفائل بأوباما، وحاسين إن أيامه هتبقى كويسه، وأتمنى إنه يوقف الحرب فى العراق، ويحاول يحل قضية فلسطين.
محمد حسن 47 سنة مدرس
أتمنى ربنا يوفقه فى تحقيق هدف زيارته، وتوصل رسالته للإسلام والمسلمين، وتكون بداية عهد جديد، يعم فيه السلام على المنطقة العربية، والأمة الإسلامية.
