فيسبوك
واتساب
العمدة كان عندنا ف البلد قاضى
وكان دايما بينا مشغول ومش فاضى
كان الوقار عليه بادى
وكان عادل وحقانى
ومكان لحد بيعادى
وكان إحساسنا بالآمان عالى
كنا بنقفل بابنا بسيخ حديد مش غالى
كنا ننام فى الجرن بره البيت
ونربط جنبنا كلب بلدى عشان ديابة الغيط
ماكنش الغش يعرف طريق بيتنا
وكان فايض أكلنا رايح لكتاكيتنا
وكان يوم الخبيز تشم ريحه العيش
على بعد كام كيلو
لعمرنا رحنا فرن
ولا جبنا رز بالكيلو
كان كل بيوتنا فيها خير
كان الخزين يكفينا
ونوزع كما للغير
فرح أى بيت فرح لكل بلدنا
وعند الحزن كمان دوار البلد يجمعنا
آه يا ماضى على جمال سيرتك
كان كل شىء فيك حلو واشم فيه عطرك
