على جلال كاشف يكتب: خفافيش الظلام

خفافيش.. النور بيعميها
وتخاف من النهار
لو بصت للشمس يوم
الشمس تكويها وتحرقها زى النار
وما أكتر الخفافيش
فى بلاد مافيهاش شاويش
فى بلاد الحق فيها
دايما فى احتضار
وزى ماتقول تقول
كله عندنا معقول
قاتل يقتل ويصبح يمشى فى الجنازة
ويقول دنيا غرور مالهاش ياخلق عازة
وتبص عليه تقول..
دا روحه فى القتيل
معلم.. ابن ليل
حافظ أصول الكار
وضربته فى الضهر دايما يحسبها انتصار
وحرامى تسأله..
المال دا جالك منين؟
يقولك.. حرمالى
مالك أنت ومالى
أنا جدى باشا.. وأبويه بيه
أنا ابن.. وابن.. وابن.. وابن
وأنت ابن مين؟
ويرفع راسه لفوق ويقولك باحتقار
أصحى ياد وفوق أنا م الناس الكبار
كلاب صارت ياخلق مابتكتفيش بعضمة
كلاب صارت وحوش وطريقها كله ضلمة
كلاب ماعدتش ترضى غير بالفريسة كاملة
بياعين كلام
ومتاجرين بالسلام
أدب وشعر ومعظمة
والكدب عايز معلمة
وأه.....
أه لو قلوبهم بيوت أو مزار
كنت هاتدخل تلاقى كل فنون الدمار
خفافيش ماتخفش غير م الشمس وم النهار
خفافيش طليقة حرة وأنت فينك يانور
مسجون فى العتمة.. وللا مسجون بين الصدور
مرتاح فى السجن.. وللا نفسك تقوم تثور
راجع والفجر راجع..
وللا الزمان بيدور
وبقينا نشوف ياعجبى..
خفافيش فى بلادنا عايشة على حساب النسور.