فتحى الصومعى يكتب: حانوتى مودرن

تصريح الدفن أتأخر ليه؟!
ميتكم كانت شغلته إيه؟!
أنا مدرسة فى الدفن الراقى
ومعاى صبيان ياخدوا البقشيش
راح تدوا الواحد منهم كام؟!
كان شغال إيه؟
شغلة شريفة؟!
واللقمة اللى أكلها نضيفة؟!
أنا بدفن بس بتوع سلطة
مخاليق كْبار
الأجرة بتاعتى العملة دولار
أنا بدفن ميت لجل أعيش
مش أموت وياه
أنا أدفن ليه واحد
دايما دنيته ناسياه
والناس اللابسة جزم دايساه
ميتكم نوع ميريحشى
لا فى حيا ولا موت
كان شوكة فى حلق اللى يطولوا
واللى يقولوا من غير ولا صوت
هاتوا تربى من بير السلم
يقضى حاجتكم من غير تغسيل
من غير تكفين
وإن كفَّن يبقى ورق جرانين
ولا يد عيشى
علشان ميكلفشى الورثة
ويقولوا آمين
أنا بدفن ناس دينها العملة
ورصيد وأرباح
والخلفة سفاح
معذرة باردون
ميتكم ينفعشى معايا
ميتكم محتاج لصلايا