يقيم قصر ثقافة الفيوم حفل تأبين الشاعر الراحل محمد الحسينى يوم 2 يوليو القادم، بحضور مجموعة من الشعراء والمثقفين بالفيوم منهم محمد أبو المجد وحسين عمر ومسعود شومان ولفيف من أدباء ومفكرى مصر ويدير اللقاء عويس معوض والشاعر محمد حسنى.
من أجواء الديوان الأخير للشاعر محمد الحسينى "مس الكلام" عن فلسفته للموت.
طرطشات برموده
-1 -
سكتين فى طريق وهمى
وعالمين من غنى نداهة
اتولد الصمت من قبلى
وأنا صمتى لسه.. فى متاهة
- 2 -
ميت
بيتحرك م الوجع
وحى
بيوجعه الموت
فيا فرد فى الملكوت
حرك سكون الأرض
اصرخ عليها
ودخلها جوا السكوت.
- 3 -
الشال أنا
للشنشنة
والشلشلة
أنا الدموع قبل البكا
والحكى وقت اللقا
قابلنى فى البكا
أقابلك فى الفرح
وارمينى بالغنا
أرميك بالمرح
فلو سرح
عقلك بعيد ما برح
المرح
نصه سرح
غامت الدنيا
ورجع الفرح
- 4 -
هم
يمسك بإيده الزمن
كما عيل
بيجرى ورا القمرا
رجع عجوز
بلا تمن
لعبت براسه الخمرا.
- 5 -
الشايل قلبه على كفه
من غير باترينه
ريح نفسه
شكل طير من دمه
خطفه
حود على أقرب شجرة
طبعه
عاود على بال ما افتكره
كان قلبه أصبح فرجه
بص عليه
مالاقاه
كان عمره ساعتها ف زمنه
تعبه
قام خطاه
ريح
على أقرب تنهيده
بتستناه.
- 6 -
كتبوا
مع بعض معاهدة
واتفقوا
إن الصبح ما يدخلش مشاعره
وإنه ينساه
رجع الصبح وخطفه
من آخر طرف الحلم
وحدفه .. جواه
فرت حتة عتمة
باقية ف إيده
كان متشعبط بيها
فى آخر حلم بيتمناه.
