أنا لسه برضه بحبها
كام فرصة جتنى أسيب مصر
ولا عمرى سبتها
علشان هى دى بلدى
إللى بجد بحبها
بحبها.. بكذبها وبصدقها
بحب فيها.. أصالة وصبر أهلها
بحب فيها السهر.. بحب زيفها وأصلها
بحب فيها .. طلعة الشمس تنور وشها
بحب فيها القمر.. طالع يغازل حسنها
بحب فيها المشى..على شط نيلها وبحرها
بحب فيها بناتها.. راسمين ملامح شعبها
دى بنت مايصة.. حاطة وردة ف شعرها
ودى بنت جد.. نازلة جرى لشغلها
............................
حتلاقى فين بلد
الكنائس والجوامع فيها بتحضن بعضها
مسلم مسيحى أخوات
راضعين حنان من صدرها
جرجس مع محمد
واقفين سوا على أرضها
بيحر سوا ترابها
من كل غادر عاوز يفرق شملها
ويناموا حاضنين بعض
لأجل شرفها وعزها
...........................
بتقوللى ظالمة! أقول لك برضه بحبها
بتقوللى ضلمة! أقولك دا سواد من شعرها
بتقوللى فيها فساد! أقولك دا من بعض أهلها
..........................
جرب كدا تسهر.. على ضف نيلها وشطها
جرب تشوف بنت حلوة مع شاب واقف جنبها
شايل هموم الدنيا فى قلبه.. لكنه داب فى حبها
جرب كدا تاكل درة.. أو كوب جيلاتى بشطها
وتشوف وجوه الناس بتضحك.. واضحك زيها
.........................
أهى هيه دى مصر
زحمة.. ضلمة.. فاسدة.. ظالمة
مش مهم.. دى كفاية خفة دمها
هفضل لمصر أقول وأعيد
أنا أصلى عاشق أرضها
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة