وائل خطاب أعمال حرة
لا مش موافق على الموضوع ده من ساعة ما بدأت حكاية أن الستات تشتغل المواصلات بقت زحمة والبطالة زادت بين الشباب ولا أقولك تلاقى إن الحكومة لقت إن أعضاء مجلس الشعب اللى يزوغ واللى نايم والكراسى فاضية قالت تجيب ستات أحسن.
غادة محمود موظفة
موافقة طبعا على هذه الزيادة، على الأقل حتكون خطوة علشان الستات والبنات يكون عندهم وعى بالانتخابات، وكمان يبقى فيه داخل مجلس الشعب نسبة معقولة للسيدات عندهم إحساس بمشاكلنا وبعدين النهاردة فيه ستات كتير يستحقوا إنهم يكونوا فى مجلس الشعب.
وائل أبوالعيون محاسب
أكيد موافق طبعاً على هذه الزيادة، فتواجد المرأة بنسبة أكبر فى البرلمان سيساهم بشكل كبير فى تسليط الضوء على المشاكل التى تعانى منها المرأة فى المجتمع المصرى، ولكن إذا كانت زيادة هذه المقاعد ستكون استكمالاً لنموذج آمال عثمان فى المجلس أكيد هذه الزيادة لا لزوم لها.
عمرو رمضان يمانى إمام مسجد
لا أوافق على هذه الزيادة لأن المرأة من المفترض أن يكون مكانها الطبيعى هو بالمنزل، معززة مكرمة ولا ينبغى لها أن تزاحم الرجال، خاصة فى المواقع التى تتطلب تغليب العقل على العاطفة، والنماذج الموجودة حاليا فى مجلس الشعب من السيدات لم تضف شيئاً جديداً لا للمرأة ولا للرجل على حد سواء.
زينب محمود موظفة
موافقة طبعا على زيادة مقاعد المرأة فى مجلس الشعب بشرط أن تكون هذه الزيادة عن طريق الانتخابات مش عن طريق التعيين، لأن النهاردة أى عضو أو عضوة متعينة مش بيعمل أى حاجة، ولو اعتبرنا أن زيادة مقاعد المرأة تمييز بين الرجال والسيدات أكيد التميز ده حيكون إيجابى مش سلبى.
محسن يوسف صاحب ورشة
هم أعضاء مجلس الشعب الرجال عملوا للناس إيه علشان يزودوا نسبة مقاعد السيدات، ياعم كل ده كلام علشان يلهوا بيه الناس وبعدين هى الست لما تتعلم وتعقد فى البيت تربى أولادها وتعلمهم بشكل كويس، ولو عندها وقت تعلم جارتها مش حيكون أفضل ألف مرة من أنها عضوة مجلس شعب ولا شورى ولا حتى وزيرة.
