من صغرى ...
بتشعلق "ف" سلك الكهربا
وبكهرب العواميد
وابكى ...
لمّا الشمعة
تقيد
واشوف الناس ...
تضحك وتثقف حواليها
وهيا بتنزل ...
دمعة "ف "ديل الدمعة
واللى حارقنى بجد
وحازز فيا:
كيف عاملين
لسقوطها
عيد
متشوفنيش
جّو ضلوعى وانا بتلّوا
لجل ماكتّف.....
كل اللى "فى" جتتى من قوه
لجل "م" حارب
قارب جوّا الجوف
وبيحبى
بيرضع ...
خوف
لجل ما يوصل للدرويش
طالب فتوى
قال:
كان لى "ف" كل مرايه زىّ
لابس نفس الوش ونفس الزّى
راح غاب عنى ولا رجعليش
قلّى :
ان كان ميت ولا حى
انا من صغرى ...
بحب الرمح
فارس ...
ولا فيش سيف ولا رمح
حاطط كل معانى القوة
" ف" جيب جلابيتى
اللى قالعها
عشان تقاليعها
مش "ع " الموضة
ولا فيش عوده ...
بتربط بينى وبينى
حتى الجبس ...
اللى اتعودت ارسمنى عليه
مبقاش بيشّك
يمكن علشان انى بشك .....
بكل ما فيا
أو علشان
مبقيتش
أعيش
