فيسبوك
واتساب
عاطف يحيى 51 سنة وكيل مدرسة ثانوى
الموظفين زعلانين علشان العلاوة اللى راحت عليهم السنة دى، ومش عارفين فى إيه، تقريبا الحكومة مش عايزة تنزلها علشان الأسعار مترفعش زى كل سنة، بس الخوف الأسعار ترفع برضه والعلاوة متنزلش، يعنى «موت وخراب ديار».
عبدالعزيز حسن 24 سنة مندوب دعاية بشركة أدوية
الحكومة زى القطاع الخاص «شاطرة فى الخصومات قبل العلاوات»، يعنى بتفتكر اللى ليها، وتنسى اللى عليها، رغم إن العلاوة بتتحسب على أساسى المرتب، اللى هو أصلا ولا حاجه.. واحد صاحبى مدرس أزهر، حسب العلاوة تعمل كام، طلعت 2 جنيه ونص.
مريم محمود 21 سنة مساعدة أستاذ جامعة
الحكومة ما صدقت إن الريس متكلمش عن العلاوة، وعملت مش واخدة بالها، ومش هتاخد بالها إلا لو الناس طالبوا بالعلاوة، لو مطالبوش بقى، يبقى خلاص «سقطت سهوا».
لطفى الفاتح 47 سنة موظف حكومة
الحكومة بيبقى سمعها تقيل مع أى حاجه ليها علاقة بزيادة المرتبات أو خدمات المواطنين، وواضح إنهم مسمعوش إن فى علاوة، والحل إننا نودى الحكومة لدكتور أنف وأذن، يمكن تسمع.
