محمد النجار 34 سنة مدير مكتبة بسور الأزبكية
بعد الكلام اللى اتكرر أكتر من مرة عن القمح الفاسد مابقيتش بتطمن للعيش، خصوصا إنى كنت بشتغل فى مخبز قبل كده، وكنت بشوف الدقيق وهو محجر ومليان حشرات، ورغم كل دا بناكل، وربنا يستر!.
أحمد على أحمد 70 سنة بالمعاش
أنا مش متطمن لأى حاجه فى البلد دلوقتى، عايزين يسمونا علشان نموت ويخلصوا مننا، وعلشان كده لوثوا كل حاجة، الأكل، والشرب، وحتى الهوا اتلوث وبقى فاسد.
الحاجة آمال 65 سنة ربة منزل
هو إيه اللى مش فاسد فى البلد يعنى علشان منخافش منه، القمح فاسد، والخضار فاسد، لما الناس جالها المرض، العيل دلوقتى بيتولد من بطن أمه عيان بالسرطان ولا الكلى ولا الكبد.
فرج محمد 40 سنة محاسب فى شركة «ألكان»
أنا مش بجيب العيش بتاع الأفران، وبشترى العيش السياحى علشان عندى أطفال وبخاف عليهم، وعلشان زحمة طوابير الأفران.
عماد السيد شفيق 28 سنة محاسب
أنا قلقان من كل حاجة، مش العيش بس، زمان كان العيش بييجى محروق، وملخبط، والجديد بقى شفته فى العيش اللى بجيبه بعيد عنك, الرغيف مليان «نشارة خشب».
محمد على 24 سنة محاسب
لو بطلنا ناكل كل حاجة نخاف منها، مش هاناكل أصلاً، أنا بطلت اشترى عيش الفرن من زمان، بشترى العيش السياحى، أو الفينو، صحيح أنه أغلى شوية، بس أريح.
