محمود سمير- 41 سنة - مدير مكتب رحلات
طبعا الأسعار هتزيد بعد العلاوة، وممكن قبلها كمان، دى حاجة اتعودنا عليها من سنين، وخلاص الناس بقت عارفة، العلاوة بتيجى من الحكومة، تروح جيوب التجار ورجال الأعمال.
محمد رمضان أحمد - 40 سنة - فنى بشركة مقاولات
كده كده الأسعار هتزيد، خلى الحكومة تعملها بجميلة علينا وتزودها مع العلاوة، بس الخوف إن الزيادة تبقى على أساس إن العلاوة 30 % زى السنة اللى فاتت..
إبراهيم محمد سليم -50 سنة - رئيس حركة النقل بشركة سيراميك
للأسف العلاوة بتيجى بالخراب على الناس، فاكر علاوة الـ 30 % بتاعة السنة اللى فاتت، لما جات زودت الأسعار 130 %، الناس دلوقتى بقت بتخاف تجيب سيرة العلاوة أحسن التجار يتلككوا ويزودوا الأسعار.
عاصم السيد حسن - 33 سنة - سائق
البيضة اللى كانت بـ 20 قرش، بقت بـ70 بعد علاوة السنة اللى فاتت، يعنى مش محتاجة كلام، العلاوة الـ10 % ولا الـ5 % اللى عاملين دوشة ملهاش لازمة ولا معنى أصلا، وفى الآخر هتيجى على دماغ الناس الغلابة، والبيضة هتبقى بـ 2 جنيه، هى دى العلاوة.
