عبد اللطيف عرفات 48 سنة مندوب مبيعات
أنا مش بعمل إقرارات ولا بدفع ضرايب بشكل مباشر، بس تقريباً الضرايب بتندفع من الاستقطاعات اللى بتتاخد من مرتبى، فبيروح جزء منها للضرايب وجزء للتأمينات وجزء لصندوق العاملين.
مجدى عبد الرحيم 49 سنة مدير بشركة قطاع عام
الإقرار بتاعى بتعمله الشركة اللى بشتغل فيها، بعد ما بتخصم الضريبة من إجمالى مستحقاتى طول السنة، وبتقدم الإقرارات فى نهاية شهر مارس، وبتدينا شهادة تفيد تسديدنا للضرايب، ودا بيوفر عليا إجراءات تقديم الإقرارات والدفع وخلافه..
جمال محمود عبد الله 35 سنة مندوب توزيع قطاع خاص
أنا لسه موصلتش لمرحلة دفع الضرايب.. لسه، لأن مرتبى لسه معداش ألف جنيه، بس بيتهيألى فيه فى الفلوس اللى بتتخصم من مرتبى جزء بيروح ضرايب أو تأمينات، حاجه زى كده.
إمام محمود أمين 57 سنة سائق
أنا معملتش إقرار علشان أنا سواق حر، ومعرفش الضرايب دى تتسدد إزاى، بس أنا بدفع التأمينات كل 3 شهور، وبيتهيألى هى هى، علشان بشوف الناس ماشية فى الشوارع بتشتكى من التأمينات وبيدعوا على وزير المالية.
