فيسبوك
واتساب
الأرض..
حضن الميتين
والشوك..
فروعه متـَبـِّتة
ع الصولجان
مين اللى خان الأرض
مين..؟
وسقاها
من نكستها طين
حبلت هوان..
النخل
شاهد فـ الخلا
على زهرة الشيطان
ماضل صاحبكم
ولا..
صمته دليل نقصان...
ممكن أوي
لما السما
تنده عليه
يفرد قلوعه،
يبتسم
ويمد إيده
ينتزع معني المطر
علشان يدوق
طعم الخلود/
الارتياح
- دا الجاى
معاند للى راح-
بس الغريب
ان الرياح
تكشف جدوره الميتة
ويبان ثباته
فـ الخريف المُر
طيش..
العمر مش قد انتظار
والموت
بيقطف م الحياة
علشان يعيش..
