هل توافق على عودة الثانوية العامة إلى نظام السنة الواحدة

شادى زويد 22 سنة بكالوريوس تجارة إنجليزى
ياريت نرجع تانى للنظام ده علشان الطلبة تذاكر بجد، من ساعة ما تم تطبيق نظام السنتين كل طلبة الثانوية بقى عندهم كسل، علشان فيه فرصة تانية، والنظام ده كمان فيه مشكلة كبيرة، خلى الأهالى فى البيوت عايشين على أعصابهم والشباب مقضينها لعب وتهريج.

محمد مدحت 22 سنة ليسانس آداب
لا مش موافق على أن الثانوية العامة ترجع لنظام السنة الواحدة تانى لأن شهادة الثانوية العامة بنظام سنتين أفضل بكتير، على الأقل بيكون أمام الطالب فرصة للتعويض لو فى حال لا قدر الله إن ربنا ماوفقوش فى السنة الأولى ولكن بجد اللى بيذاكر ومحدد هدفه من الأول مابتفرقش معاه سنة ولا سنتين.

آلاء محمد طالبة آداب جغرافيا
الحمد لله أنا أخذت ثانوية عامة من السعودية، بس لما جيت مصر علشان الجامعة عرفت إن بعبع الثانوية العامة ده عامل رعب جامد هنا بس مش عارفة ليه كده، وعرفت من فترة إن فيه كلام إنها ترجع تانى لنظام السنة الواحدة، وأنا رأيى إنها لو رجعت سنة واحدة يكون أفضل وأريح.

شاهندة على أحمد طالبة آداب تاريخ
سنة واحدة لأ.. ده تبقى صعبة علشان حتكون سنة مضغوطة جدا والمواد حتكون كثيرة على سنة واحدة، وكمان ماحدش حيقدر يحول من أدبى ويروح علمى أو العكس، بس هو فيه مشكلة إن الدروس الخصوصية موجودة فى الحالتين.

إسلام أشرف 17سنة ثانوية عامة.
أهلى فى البيت نفسهم ترجع سنة واحدة تانى وكمان نفسهم أجيب مجموع كبير بس ده صعب يحصل لو بقت سنة واحدة، لأن المواد كتيرة جدا والوقت مش بيكفى علشان المذاكرة ومواعيد الدروس.

عبدالرحمن سيد 17 سنة ثانوية عامة.
لا، سنة واحدة ماتنفعش علشان الواحد يجيب مجموع وماتنفعش إنك تذاكر فيهم 10 مواد لكن لو كل سنة 5 مواد، زى نظام السنتين اللى شغال دلوقتى ممكن نجيب مجموع كويس.