لازم نؤيد قصيدة لأبو زيد بيومى

ولإنك إنت الوحيد اللى بينّا اللى سيد
فلازم نؤيد
ما انت الطريق اللى لينا اترسم
وانت النصيب اللى بينّا اتقسم
انت الخريطة وانت العلم
إنت الوحيد اللى بينّا اللى سيد
انت راعينا و احنا الغنم
وإنت الوحيد اللى بينّا اللى سيد
فلازم نؤيد

دايما كلامك رصين محترم
وعاقل وهادى تقولش نغم
ما يقصدش وجهة ولا يروح لـ يمّ
ما انت الرزين الحكيم المحيّد
فلازم نؤيد

خطابك مصيرى لمسيرة الكفاح
فلازم سعادتك تكون فـ انشراح
جميع مملكتنا لخطوك براح
تأسون تشرّم تمطرح تفيّد
فلازم نؤيد

حلولك سريعة فـ ربط البطون
لا احنا هانحزن ولا يحزنون
ما انت الشرعة وانت القانون
تشطب بنوده ... تضيف أو تزوّد
فلازم نؤيد

انت الموفق رؤوسنا فـ حبالك
وانت اللى ماسح عقولنا ( بجمالك )
بدأنا صيامنا بطلعة هلالك
تريّل ..... ها نلحس .. تنطق ... نردّد
فلازم نؤيد

تغضب .. نعلن ما بينّا الحداد
تزعل ... يغمر قلوبنا السواد
و لو مرة واحدة نسيت و ابتسمت
نرقص عرايا وننزل نعيّد
فلازم نؤيد

رؤية زكية فـــ أمور الإمارة
خلّتنا ننتج و ناخد صدارة
لو خطبة واحدة فى قلب الوزارة
نسمعها منّك ... نفقس و نولد
فلازم نؤيد

خُـد م اللى عايزه من غير كسوف
واكتب بنودك واملا الكشوف
مربط وجردل لزوم الخروف
احسب وجمّع و سجّل و قيّد
واحنا نؤيد
لازم نؤيد
لازم نؤيد