سنية «أم ياسر السيد»: أنا ربيت خمس عيال كبيرهم مدرب منتخب السويس

«ربيت خمس عيال لوحدى.. زينتهم ياسر, علشان كده أنا أم ياسر».. هذا ما قالته الحاجة سنية ذات السبعين عاما عن حياتها التى اختفى منها الشريك والأب فجأة، لتجد نفسها مع الأولاد الخمسة بلا عائل.

تقول: «فرحتى ماتتوصفش لما ياسر بقى مدرب منتخب السويس, كنت حريصة على  تشجيعه, فاشترى لى  فيديو علشان أشوف كل مبارياته المسجلة، وتضيف: مكانش ممكن أسيب الحزن على أبوالعيال يهدنى علشان هوه كان عايزهم أحسن ناس، وكان لازم أكمل وراه, وفعلا كان فيه بركة غريبة رغم أن دخلنا كله على بعضه 100 جنيه، لكن الولاد كانوا شاطرين ورزقهم بيجى لهم لحد عندهم, أصل الرزق ده مش فلوس وبس, الرزق ده محبة الناس, والقبول, والصحة, والتعليم, وأعظم مكافأة أعطاها لى الله عندما وجدت أبنائى الخمسة فى وضع اجتماعى لائق فـ«منى» مهندسة زراعية و«محمد» مهندس زراعى و«رضا» مدير إدارة بشركة بترول كبرى و«حسام» محاسب بشركة غزل ونسيج و«ياسر» آخر العنقود الذى اختار كرة القدم واختار طريقه بنجاح حتى أصبح لاعباً معروفا بالسويس ومدربا بالفريق الأول لمنتخب السويس بعد ذلك. أضافت والدموع تنهمر من عينيها: إن أسعد لحظاتها عندما يتجمع حولها أحفادها وتحكى لهم مواقف أبنائها عندما كانوا أطفالاً صغاراً مثلهم وتوجه إليهم النصائح والحكم.