محمد رضوان يكتب.. ابن الناظر

تصورت بعقلى يوماً أن لهذا الشعب كلمة وحق فى تصحيح أوضاع بلده وجاءتنى فكرة من كلمة تصحيح وهى تصحيح امتحانات الثانوية العامة أو تصحيح الواجبات.

وقلت فى نفسى مبدئياً "الحكومة بتعتى دى زى السباك اللى جى يصلح الحمام وياخد فلوس لو مصلحوش يبقا فاشل ولو صلحو دى شغلتو"، لكن ديماً بشوف أهلى لما السباك بيخلص يااما "الله ينور" يااما "متشكرين جداً" فقول الله هو مش بياخد فلوس مقابل دا ولا بياخد روح معنوية.
يعنى لو بوظ الدنيا هنعمل إيه "لقيت نفسى مش لاقى حاجة أقولها" لأنه لازم يصلح مش جى يبوظ ولأن السباك دا قديم معانا فعارف الحمام شكلو أيه.

وقبل ما يجى غالباً عارف العيب وعارف أننا على قد حالنا مش حنغير الحمام لكن بيجى وياخد شكر وفلوس ويلصم الحمام
"مع أن الحمام دا عايز يتهد" لكن ماشى على قد فلوسنا
"بس بقول بينى وبين نفسى: هو السباك اللى مستغل ولا احنا اللى هبل".
لقيت الاتنين مش نافعين.
نرجع لتخيل التصحيح.
كنت بقول لو البلد دى كلها مدرسة كبيرة والشعب هو اللى بيدى الدرجات للحكومة.
*هل ينفع نسقط الحكومة دى؟
*نقدر نديها ملحق أو حتى نعنفها بكلمتين علشان تتعدل وتذاكر؟
*طيب تتذنب مثلاً؟
لقيت أن الحكومة دى ياما الواد "ابن الناظر" يااما متنفعش تبقا تلاميذ أصلاُ.
ودا لسبب بسيط أنهم مش بيتعلمو وزى ابن الناظر كلامهم صح حتى لو غلط.
اصل ابن الناظر لو نصب المبتدأ عادى وصح على فكرة
لأن القانون لا يحمى المغفلين من النصب حتى لو أول مرة يتنصب عليهم يعنى مبتدأ.
قلت طيب أعمال السنة نحطها فلقيت أصلاً مبيحدروش كلهم ولافى طابور صباح ولا بيحيو العلم.
فسألت هو النهاردة وامبارح وأول وبكرة وبعده إجازة ولا الشهر دا كلو إجازة ولا السنة اتلغت.
لقيت مدرس زميل بيقلى الحق جهز كشكول التحضير علشان الموجة جى.
قلتلو والطلبة سكت وسبنى ومشى.
دخل الموجه مع الناظر الفصل.
قيام يا ولاد.
لقيت نفسى أنا اللى بقوم.
سألنى الموجه كام سؤال فى المادة.
لقيت نفسى مش عارف أجاوب.
الله
ازاى وأنا المدرس ومش عارف.
مع أن السؤال فى المنهج بس مش عارف.
فالناظر بصلى وهو خارج بسخرية وقالى حنعديهالك المرة دى ومش حنرفدك علشان فى نقص فى المدرسين.
قلتلو ولاد حضرتك الطلاب فين.
قالى حيجو ليه ومفيش حد يشرحلهم ولا يصحح لهم ورق الامتحان دا لو امتحنو أصلاً.

--

فجأة لقيت مديرى فالشغل بيصحينى من النوم ويقلى خلصت شغل تصميمات مصحلت الضرايب قلتلو أنهى.
قالى بتاعت الإعلان الجديد بتاع الضريبة العقارية
قلتلو ضريبة عقارية على أيه
قالى بيتكو عليه ضريبة عقارية
قلتلو ليه
قالى هو مش أنت نايم فى
فسكت
قالى هو أنت حتنام ببلاش
قلتلو مهو بيتنا
قالى أه هو اللى فى حمام بايظ دا حناخد منك ضريبة عليه علشان تعرف تنام بعد كدا
--
وأنت من أهل الخير
"أهل الخير هما المصريين"

* مصمم جرافيك