عمرو السعودى يكتب من البرازيل.. أى حاجه قديمه للبيع

الجمعة، 25 ديسمبر 2009 08:12 م

أى حاجة
بس مش كل الحاجات
أصل لسه النهر عايش
يتخلق منه النبات
أصل لسه فى حلاوة
جوه خيط غزل البنات
لسه بيزن فى ودانك
التزامك بالعادات
جوه حصالة حياتك
لسه باقية المعجزات
اللى فيها الفجر طالع
لاجل خطر الأمنيات
أى حاجة قديمة ممكن
بس مش ممكن يكون
الأمل يتباع بحاله
تنطفى فيها العيون
لسه فيك ريحة أبوك
لسه فيك قلبه الحنون
لسه فيك الصبر رافض
احتمال فرح الجنون
أو يهون حضن الأحبة
حتى لو مليان سكون
فيه حاجات بتعيش وتبقى
حتى لو جوه السجون
أى حاجة قديمة ممكن.
بس مش ممكن يكون