هيثم عبد الشافى يكتب.. عقد نوى

حدى ..... دارى
غيطى ..... أرضى
إمبارح كله وأنا تحت النخلة العوجة
قلت لامسى طظ وعملت هوجة

حليتلك شايك كراملة
مليتلك جيوبى أرواح
ف حجرى عروسة قطن نامت ننا
تصحى أطير فيها لفوق من غير جناح

هناك .....
شغلتلك عقد نوى
ماحلاها ضفاير سعف
غوش حبيبتى يا قزايز الدوى
خدى
رمشك ضله وأنا قلبى خلاص اتسقف

يللى ف حسك ريحة الستينات
عصيت الأيام ف هواكى
رضع قلبى من قلبك عمره اللى فات
والتايهة ف حضنك تلاقينى
والقاها معاكى

اعلى عليوة
ف ايد الشوق طلعناها
أجى أنام ف حجرك مرجيحه
فراش ... ورد توبك غواها

من ورد بكره كحلنا صبانا
م الليل سرقنا الكحل سرقه
طير السما اتكحل معانا
وعطرك صابون بريحه
عشب أخضر شالك
البحر ف كفك ريحه
الشمس رسمك
والقمر خالك
ولاف دارى ولا ف دارك
قبل النهار بنهار
ينام العشق ف حجرك
ويتغطى بحرامك

ف ضل أى ضريح
ننام ع الآخر
كده وكده نموت
بكره م الحسرة مات جريح
دنيتنا قمر وليل
بكره حرم يفوت ...