ضريح قديم.....
مكتوب عليه....
لكن الكتابة مبهمه!
أو م اللمس والمسح
تبانلك متنخربه!
نصه التحتانى بويه بني
أعلاها بويه خضره
مزروع فى قلبه من فوق
عصايا جريد فيها راس
ملفوف عليها عمه شاش...بشريط أخضر
وف نص الشريط مكتوب بلاحمر
(الله أكبر)
سيدنا غير خط سيره
رفض ملاجئ الموتى!
قام من تابوته...
صرخ...حلف بربه ودينه
ماهو راقد إلا ف حضن دارى
وبالتحديد ف قلب أوضتى...
اللى انا لسه متولدتش فيها!
واتحطيط جنب سيدنا...
لاجل المباركه ونول الكرامات
جابت أمى أربع لمض نمره عشره
وزرعتها ع الحواف الأربعه
وبجنيه ايكا...لاجل العيال تاكل وتنبسط
وقصعه اتمدت تلت تيام
(رز بلبن لكنه بملح)
وانكتب عليا ابات خايف واصحى مكشر
ابوس الضريح ألف بوسه ع ريق النوم
والمع لمضه القزاز
وازود الناقص م الجاز
واسمع ندر مره
عاقر هتجيب فرختين لو حبلت
وشايب بيوسط سيدنا...
لاجل ينقام شان والده
واذ تم المراد هيجيب م الايكا لحستين
واللى انا مستفاده...من دى الحكايه
بقرا فواتح مخلوطه بدمع
تنزل رحمه ونور...على ابويا المسافر
***
والعيش والملح أنا خلاص مبقاش فيا
نومتى مع ده الضريح...اصبحت مقلقه
وعشان ترضينى أمى قالتلى كدب
أن ده قبر أبويا...صدقت
وبربت على خطاط بلدنا
كتبلى اسم أبويا بالبنط العريض
وكذا آية منورين...
يربطونى بأبويا أكتر!
أبويا يللى ماشفتكش
يللى راقد ف حضنى ليل ونهار
هتدنك لأمتى ... لابد كده
اطلع لى من ده المربع
لو كنت أبويا
أحضنك مره
وابوس ايدك وش وضهر
واشرب من بحر نصايحك
واشم فيك عرق شتاك وصيفك
وتعرق كفوفى ف قلب كفوفك
وارجع نام تانى!
مشاركة
اضف تعليقاً واقرأ تعليقات القراء
مشاركة
