فيسبوك
واتساب
من غير سبب
تلاقينى فجأه مكتئب
لابس لنفسى الوش ده
وش الخشب
والدنيا عتمة
والسما..
عماله تتقطع حتت
نازلة على دماغى العنيدة اللينة
بأفكار تطارد بعضها
المود وحش
باحلق فى دقنى والشنب
باكوى القميص
والبس عشان..
الحق أنام
فى الاكتئاب..
مفيش أحن من السجاير والسرير
وأحلى كوباية عصير..
تكسر مرارة الحلق أثناء الشرب
ممكن - وأحيانا وبس-
ف الحالة دى
تمسك قلم
ترسم خطوط متكسرة
متدورة
مترتبة ومتبعترة
كلام عبيط
تنام وتصحى
وتلاقيه بقى فلسفة
خد الجديد
كل الفلاسفة فى الأساس
محبطين
عايشين عشان يتأملوا م الاكتئاب
انا مكتئب، مش فيلسوف
وأكتر سؤال
بيخلى أعصابى القديمه ترتعش
"ايه مزعلك؟"
"عايز فلوس؟"
ومن غير سبب
تلاقينى فجأه مكتئب
أنا باعتبرها
قلة أدب!
أحمد عطا الله
