مدحت أنور نافع يكتب:أزجال وتناتيش للعبرة

شفت الزمن بيدور يا ولاد
ويلف والشاعر إنســان
ماتحركوش غير الأمجاد
حتى اسألوا عبد الرحمن
لما افتكر عبد الناصـر..

مايكونش ناسى بيوت وقصور
اتهلبت فى العهـد إيــاه
والحكم بالظلم وبالــزور
والشلة بتبرطع فى الجـاه
شلة جمال عبد الناصـر؟!

واياك تكون ناسى الثــوّار
عمك نجيب، صدّيق وحكيم؟
مرسومة فى سيـفه الغدار
أسوأ نهاية لكل زعيــم
زعّل جمال عبد الناصـر

والمعتقل لو كنــت نسيـت
شرّع بداية من الطغيـــان
وإن كنت عن طيب قلب رضيت
بالضرب والتعذيب..غلطــان
درويش جمال عبد الناصــر

واياك نسيت النكسة كمــان
لما اتهزمنا فـ ست ساعـات
والجيش مفتت فى البــلدان
والخيبة كــانت بفيونكات
راجع تاريــخ عبد الناصر

والسد عــالى قالولنا عليه
الخير معاه حيزيد ويــدوم
الطينة محشورة فـ رجليـه
من يومها والمحصول مهموم
بيقول شهيــد عبد الناصر

معذور ماهو انت ماشفتش يوم
من بعد يوليو مافهش فســاد
يمكن يكون زاد بين القــوم
أو قول ظهر..لا نقص ولا زاد
من بعد موت عبد النــاصر

* خبير اقتصادى